मस्कट (हाम्रो खेलकुद) – नेपालले आइसिसी टि२० विश्वकप छनोट ए को पहिलो सेमिफाइनल युएईले प्रस्तुत गरेको विशाल विजयी लक्ष्य पछ्याउनेक्रममा छैटौं विकेट गुमाएको छ ।

अक्टोबर नोभेम्बरमा अष्ट्रेलियामा हुने टि२० विश्वकपमा स्थान बनाउन १ सय ७६ रनको विजयी लक्ष्य पछ्याएको नेपालले १३ ओभरमा ६ विकेट गुमाउँदै ८८ रन बनाएको छ । तीव्र गतिका बलर जुनैद सिद्दिकले पहिलो ओभरको चौथो बलमा आसिफ शेखलाई शून्यमा एलबीडब्लू आउट गरे । लगत्तै अर्को बलमा लोकेश बम ठूलो सट खेल्ने धुनमा एज लागेर प्वाइन्टमा मोहम्मद वासिमबाट गोल्डेन डक आउट क्याचपछि नेपालले खराब सुरुवात गरेको हो ।

जुनैदको तेस्रो ओभरको पाँचौं बलमा कुशल भुर्तेल एज लागेर विकेटकिपर वृत्य अरविन्दबाट ७ रनमा क्याच आउट भएपछि नेपाल संकटमा परेको परेको थियो । आरिफ शेख १२ बलमा १ चौकासहित ११ रनमा आउट भए । स्पिनर अहमद राजाको १३ औं ओभरको चौथो बलमा ज्ञानेन्द्र मल्ल वासिमबाट २० रनमा क्याच आउट भए । उनले १६ बलमा १ चौका र १ छक्का प्रहार गरे । लगत्तै अर्को बलमा दीपेन्द्र ३८ रनमा एलबीडब्लू आउट भए । ३८ बलमा दीपेन्द्रले ३ चौका प्रहार गरे । क्रिजमा सन्दीप लामिछाने र विवेक यादव छन् ।

त्यसअघि ओमान क्रिकेट एकेडेमी ग्राउन्ड–१ मा टस जितेर पहिला ब्याटिङ रोजेको युएईले निर्धारित २० ओभरमा ७ विकेट गुमाउँदै १ सय ७५ रन बनाएको थियो । युएईका ओपनर मोहम्मद वासिमले ४८ बलमा ४ चौका र ४ छक्कासहित सर्वाधिक ७० रन बनाए । १९ वर्षिय विकेटकिपर अरविन्द २३ बलमा ५ चौका र ३ छक्कासति ४६ रनमा आउट भए । नेपालका जितेन्द्र मुखियाले ४ ओभरमा ३५ रन खर्चेर ३ विकेट लिए । अभिनाश बोहराले ४ ओभरमा ४६ रन खर्चेर ३ विकेट लिए ।