मस्कट (हाम्रो खेलकुद) – युवा ओपनर कुशल भुर्तेलले आइसिसी टि२० विश्वकप ग्लोबल छनोट ए मा फिलिपिन्सविरुद्ध सानदार शतक प्रहार गरेका छन् ।

कुशलले ५७ बलमा आफ्नो पहिलो अन्तर्राष्ट्रिय शतक प्रहार गरेका हुन् । कुशल नेपालबाट टि२० आईमा शतक प्रहार गर्ने तेस्रो खेलाडी बनेका छन् । कुशलले ९७ बलमा १३ चौका र १ छक्का सहयोगमा शतक पूरा गरे ।

मस्कटमा रहेको ओमान क्रिकेट एकेडेमी ग्राउन्ड–२ मा टस हारेर ब्याटिङ थालेको नेपालले १८.२ ओभरमा २ विकेट गुमाउँदै २ सय १ रन बनाएको छ । क्रिजमा ओपनर कुशल भुर्तेल ५७ बलमा १३ चौका र १ छक्कासहित १ सय रनमा अविजित छन् । दीपेन्द्रसिंह ऐरी ४६ बलमा ६ चौका र ४ छक्का सहित ८३ रनमा अविजित छन् ।

तेस्रो विकेटका लागि कुशल र दीपेन्द्रले १ सय ६५ रनको शतकीय साझेदारी गरि सकेका छन् । जुन नेपाली टि२० आईमा कुनैपनि विकेटका लागि भएको उच्च साझेदारी हो ।

कुशल नेपालबाट टि२० आईमा शतक बनाउने तेस्रो खेलाडी हुन् । यसअघि नेपालबाट २०१९ को १३ औं दक्षिण एसियाली खेलकुद (साग) मा भुटानविरुद्ध ज्ञानेन्द्र मल्लले ५५ बलमा १ सय ७ रनको शतकीय इनिङ खेलेका थिए । पारस खड्काले २०१९ मा सिंगापुरविरुद्ध ५२ बलमा १ सय ६ रनको अविजित शतकीय इनिङ खेल्दै टि२० आईमा शतक प्रहार गर्ने नेपालबाट पहिलो खेलाडी बनेका थिए ।

ओपनर आसिफ शेखले आफूले सामना गरेको पहिलो बलमै (गोल्डेन डक) भए । तीव्र गतिका बलर ड्यानियल स्मिथले दोस्रो ओभरको पहिलो बलमै आसिफलाई एलबीडब्लू आउट गर्दै पेभेलिएन फर्काए । त्यसअघि पहिलो ओभरमा अर्का ओपनर कुशल भुर्तेलले ६ बल खेल्दै २ चौकासहित ९ रन जोडेका थिए । कुशल मल्ल १० बलमा २ चौकासहित १२ रनमा आउट भए । पाँचौं ओभरको दोस्रो बलमा कुशल मल्ललाई मिग्गी पोडोस्कीले मुजाममी शहजादबाट क्याच गराएका थिए ।