मस्कट (हाम्रो खेलकुद) – अनुभवी ब्याटर शरद भेषावकर चोटका कारण ओमानमा जारी आइसिसी टि२० विश्वकप छनोट ए गुमाउने भएपछि युवा अलराउन्डर कुशल मल्लले उनको स्थान लिएका छन् ।

चोटका कारण अनुभवी ब्याटर शरद भेषावकर प्रतियोगिताबाट बाहिरिएपछि उनको स्थान कुशल मल्लले लिएका हुन् । कुशल फिलिपिन्ससँगको खेलमा प्लेइङ ११ मा समेत छन् । मस्कटमा रहेको ओमान क्रिकेट एकेडेमी ग्राउन्डमा फिलिपिन्ससँग नेपालले टस हारेर पहिला ब्याटिङ गर्दै छ । नेपालले ओमानसँगको खेलबाट विवेक यादव र कमलसिंह ऐरीलाई विश्राम दिएको छ । गुलशन झा र कुशल मल्ललाई आजको प्लेइङ ११ मा खेलाएको छ ।

कुशल यसअघि नेपालको अन्तिम १४ सदस्य घोषणा टोलीमा थिएनन् । ओमानसँग शुक्रबार शरदको स्थानमा बेन्चमा थिए । शरदको एंकलको चोटको कारण प्रतियोगिता गुमाउने भएपछि उनको स्थान कुशल मल्लले लिएका हुन् ।

गत वैशाखमा भएको त्रिकोणात्मक टि२० आई सिरिजको फाइनलमा नेपालले निर्धारित २० ओभरमा ३ विकेट गुमाउँदै २ सय ३८ रन बनायो । नेपालले टि२० आईमा बनाएको सर्वाधिक ठूलो योगफल थियो । कुशलले २४ बलमा ५ छक्का र २ चौकासहित ५० रनको कीर्तिमानी अविजित इनिङ खेलेपछि सम्भव भएको थियो ।

दुई वर्षअघि अमेरिकासँग टियु मैदानमा ओडिआईमा डेब्यू खेलमा कुशलले अर्धशतक जोडेका थिए । कुशल ओडिआई र टि२० दुवैमा अर्धशतक बनाउने विश्वकै कान्छा खेलाडी हुन् । कुशल विष्फोटक ब्याटिङसँगै पार्टटाइमका राम्रा स्पिनर हुन् । उनी टोलीमा हुँदा बायाँ हाते खेलाडीको सन्तुलन पनि मिल्नेछ ।

कुशलले नेपालबाट ११ टि२० आई र ८ ओडिआई खेल खेलेका छन् । त्रिभुवन आर्मी क्लबबाट कुशलले घरेलु क्रिकेट खेल्ने गर्दछन् । २०२१ मा कुशल टिम आबूधाबीबाट टि १० विदेशी लिग समेत खेलेका थिए । यसअघि कुशल अन्तिम टोलीमा नहुँदा चर्को आलोचना भएको थियो । कुशलले २०१९ मा सिंगापुरमा भएको त्रिकोणात्मक सिरिजमा जिम्बावेविरुद्ध टि२० आईमा डेब्यू गरेका थिए ।