मस्कट (हाम्रो खेलकुद) – नेपालले आइसिसी टि२० विश्वकप ग्लोबल छनोट ए मा बलिङतर्फ ओमानविरुद्ध सानदार प्रदर्शन गरेको छ ।
१ सय १८ रनको सामान्य विजयी लक्ष्य पछ्याएको ओमानले ९ ओभरमा ५ विकेट गुमाउँदै ३४ रन बनाएको छ । ओमानका आमिर कलिम र शोएब खान क्रिजमा छन् ।

तीव्र गतिका बलर कमलसिंह ऐरीले पहिलो ओभरको तेस्रो बलमै ओपनर कश्याप प्रजापतिलाई शून्यमा दीपेन्द्रसिंह ऐरीलाई क्याच गराए । दोस्रो ओभरको पाँचौं बलमा जितेन्द्र मुखियाले अयान खानलाई ३ रनमा विकेटकिपर आसिफ शेखबाट क्याच गराउँदै दोस्रो सफलता दिलाए ।
छैटौं ओभरको दोस्रो बलमा दीपेन्द्रले ओमानका प्रमुख ब्याटर जितेन्दर सिंहलाई मिडअफबाट उत्कृष्ट रन आउट गराएपछि नेपालले खेलमा सम्भावना देखाएको छ ।

उनले १८ बलमा ९ रन बनाए । सन्दीप लामिछानेले खवर अलीलाई सातौं ओभरको चौथो बलमा ७ रनमा बोल्ड आउट गर्दै ओमानलाई ३१–४ को कमजोर अवस्थामा पुर्याए । कप्तान जिशान मकसुद दीपेन्द्रसिंह ऐरीको आठौं ओभरको पाँचौं बलमा ठूलो सट खेल्नेक्रममा एज लागेर मिडअनमा कुशल भुर्तेलबाट २ रनमा क्याच गराउँदै नेपाललाई जितको आशा देखाएका छन् ।

त्यसअघि ओमानको मस्कटमा रहेको अल अमरेत क्रिकेट ग्राउन्ड -१ मा टस हारेर ब्याटिङ थालेको नेपालले निर्धारित २० ओभरमा ८ विकेट गुमाउँदै १ सय १७ रन बनाएको थियो । नेपालका आरिफ शेखले ३७ बलमा २ चौका सहित सर्वाधिक ३८ रन बनाए । कप्तान सन्दीप लामिछाने ७ बलमा १ चौका र १ छक्कासहित १६ रनमा अविजित रहे ।

ओमानका स्पिनर खवर अलीले ४ ओभरमा ३० रन खर्चेर ३ विकेट लिए । बिलाल खानले ३ ओभरमा २५ रन खर्चेर २ विकेट लिए । फैज बट र जिशान मकसुदले १–१ विकेट लिए ।