एजेन्सी – युवा विकेटकिपर निकोलस पुरनको अर्धशतकको सहयोगमा वेस्टइन्डिजले पहिलो टि२० आई खेलमा भारतलाई १ सय ५८ रनको मध्यम लक्ष्य दिएको छ । इडेन गार्डेन कोलकातामा टस हारेर ब्याटिङ थालेको वेस्टइन्डिजले निर्धारित २० ओभरमा ७ विकेट गुमाउँदै १ सय ५७ रन बनायो ।

वेस्टइन्डिजका पुरनले ४३ बलमा ४ चौका र ५ छक्कासहित सर्वाधिक ६१ रनको योगदान दिए । काइल मेयर्सले २४ बलमा ७ चौकासहित ३१ रनमा एलबीडब्लू आउट भए ।

कप्तान काइरन पोलार्ड १९ बलमा २ चौका र १ छक्कासहित २४ रनमा अविजित रहे । ओपनर ब्रेन्डन किंग भुवनेश्वर कुमारको पहिलो ओभरको पाँचौं बलमा सूर्यकुमार यादवबाट ४ रनमा आउट भए ।

दोस्रो विकेटका लागि पुरन र मेयर्सले ४७ रनको साझेदारी गरेका थिए । मेयर्स स्पिनर युजभेन्द्र चहलको बलमा एलबीडब्लू आउट भए । डेब्यू खेल खेलेका स्पिनर रवि विश्रोईले ११ औं ओभरको दोस्रो बलमा रोस्टन चेशलाई ४ रनमा एलबीडब्लू आउट गरे । तीन बलपछि रोभम्यान पावेललाई २ रनमा क्याच गराए ।

पुरन हर्षल पटेलको बलमा ठूलो सट खेल्ने धुनमा विराट कोहलीबाट क्याच आउट भएका थिए । भारतका लेग स्पिनर रवि विश्रोईले ४ ओभरमा १७ रन खर्चेर २ विकेट लिए । हर्षल पटेलले ४ ओभरमा ३७ रन खर्चेर २ विकेट लिए । भुवनेश्वर कुमार, दीपक चाहर र युजभेन्द्र चहलले १–१ विकेट लिए ।