एजेन्सी – भारतीय क्रिकेट टोलीका युवा ब्याटर श्रेयस ऐर इन्डियन प्रिमियर लिग (आइपिएल) मा फ्रेन्चाइज टोली कोलकाता नाइट राइडर्सको नयाँ कप्तानमा नियुक्त भएका छन् ।

कोलकाताले बुधबार ऐर कप्तानमा नियुक्त भएको जनाएको छ । आइपिएल २०२२ को मेगा अक्सनमा चार दिनअघि कोलकता नाइट राइडर्सले ऐरलाई १२ करोड २५ लाख भारुमा अनुबन्ध गरेको थियो । अक्सनमा ऐरलाई किन्न दिल्ली क्यापिटल्स, लखनऊ सुपर जायन्ट, कोलकता नाइट राइडर्सबीच कडा प्रतिस्पधा भएको थियो ।

ऐरको कप्तानीमा दिल्ली क्यापिटल्स २०२० मा पहिलो पटक फाइनलमा पुगेको थियो । २०१५ देखि दिल्लीबाट अइपिएल खेल्दै आएका ऐरले ८७ खेलमा १६ अर्धशतक सहित २ हजार ३ सय ७५ रन बनाएका छन् । ऐर मध्यक्रमका भरपर्दा ब्याटर हुन् । भारतीय किकेटको भविष्यको कप्तानको रुपमा समेत हेरिएको छ ।

दिल्ली क्यापिटल्समा २०१८ मा गौतम गम्भिरले कप्तानी छाडेपछि ऐरले उक्त जिम्मेवारी निर्वाह गरेका थिए । त्यो सिजन लिगबाटै बाहिरिएपनि २०१९ मा प्लेअफ यात्रा तय गरेको थियो । २०२० का ऐरको कप्तानीमा दिल्ली पहिलो पटक फाइनलमा पुग्न सफल भयो । तर फाइनलमा दिल्ली मुम्बईसँग ५ विकेटले पराजित भएको थियो । ऐरको कप्तानीमा दिल्लीले पछिल्ला तीनै संस्करणमा उत्कृष्ट प्रदर्शन गरेको थियो ।

गौतम गम्भीरको कप्तानीमा कोलकाताले २०१२ र २०१४ मा उपाधि जितेको थियो । यस सिजनमा ओईन मोगर्नको कप्तानीमा फाइनलमा पुगेको थियो । तर चेन्नई सुपर किंग्सले २७ रनले हराउँदै उपाधि जितेको छ । कोलकाताको यसअघि सौरभ गांगुली, ब्रेन्डम म्याकुलम, गौतम गम्भीर, दीनेश कात्तिक हुँदै ओईन मोर्गनले कोलकाताको कप्तानी गरेका थिए । मोर्गनको कप्तानीमा यस सिजन फाइनल खेलेको थियो । तर मोर्गनलाई फुकुवा गरेपछि नयाँ कप्तान आवश्यक परेको थियो ।

कोलकाता तेस्रो उपाधिको सोचमा हुनेछ । यो सिजनमा कोलकाताले अक्सनमा श्रेयस ऐरसँगै प्याट कमिन्स, टिम साउथी, एलेक्स हेल्स, साम बिलिंग्स, मोहम्मद नाबी, उमेश यादव लगायतका खेलाडी किनेका थिए । आन्द्रे रसेल, सुनिल नारायण, बरुण चक्रवर्ती र वेंकटेश ऐर जस्ता खेलाडी छन् । आइपिएल अप्रिल पहिलो सातादेखि सुरु हुने सम्भावना छ ।