एजेन्सी – घरेलु टोली अष्ट्रेलियाले श्रीलंकासँग पाँच टि२० आई सिरिज दुई खेल अगावै जितेको छ । मंगलबार तेस्रो टि२० आई खेलमा श्रींलकालाई ६ विकेटले हराउँदै अष्ट्रेलियाले ३–० को अग्रता लिदै दुई खेल अगावै जितेको हो ।

१ सय २२ रनको विजयी लक्ष्य पछ्याएको अष्ट्रेलियाले १६.५ ओभरमा ४ विकेट गुमाउँदै पूरा गर्यो । अष्ट्रेलिया युवा ब्याटर जोश इंग्लिस २१ र मार्कस स्टोइनिस १२ रनमा अविजित रहे । ग्लेन म्याक्सवेल २६ बलमा ३ चौका र २ छक्कासहित सर्वाधिक ३९ रनमा क्याच आउट भए । कप्तान आरोन फिन्चले ३६ बलमा ३ चौकासहित ३५ रन बनाए ।

ओपनर बेन म्याकडर्मोट पहिलो बलमै गोल्डेन डक आउट हुँदा अर्का ओपनर एश्टन अगरले १३ रन जोडे । श्रीलंका स्पिनर महेश थेक्सनाले ४ ओभरमा २४ रन खर्चेर ३ विकेट लिए ।

त्यसअघि मनुका ओभल क्यानवेरामा टस हारेर ब्याटिङ थालेको श्रीलंकाले निर्धारित २० ओभरमा ६ विकेट गुमाउँदै १ सय २१ रन बनाएको थियो । श्रीलंका कप्तान दासुन शनकाले ३८ बलमा ५ चौकासहित सर्वाधिक ३९ रन बनाए । दीनेश चान्डिमल २५ र पाथुम निसंकाले १९ रनमा आउट भए । अन्य ब्याटरले भने राम्रो प्रदर्शन गर्न सकेनन् ।

अष्ट्रेलिया तीव्र गतिका बलर केन रिचर्ड्सनले ४ ओभरमा २१ रन खर्चेर ३ विकेट लिए । जोश हेजलवुड, एस्टन अगर र ग्लेन म्याक्सवेलले १–१ विकेट लिए । अष्ट्रेलिया पहिलो खेलमा २० रन, दोस्रो खेलमा सुपर ओभर र तेस्रो खेलमा ६ विकेटले विजयी भएको थियो । चौथो खेल १८ फेब्रुअरीमा र २० फेब्रुअरीमा मेलबर्नमा हुनेछ ।