मस्कट (हाम्रो खेलकुद) – नेपाली राष्ट्रिय क्रिकेट टोलीका कप्तान सन्दीप लामिछानेले अफगानिस्तानका लेगस्पिनर राशिद खानको कीर्तिमान तोडेका छन् । चार देश सम्मिलित टि२० आई सिरिजमा आयरल्यान्डविरुद्ध सन्दीपले एक विकेट लिँदै नेपालबाट ५० विकेट लिने पहिलो खेलाडी बनेका छन् ।

सन्दीपले २९ टि२० आई खेलमा ५० विकेट पूरा गरेका हुन् । उनी टि२० आईमा सर्वाधिक छिटो ५० विकेट लिने तेस्रो खेलाडी बनेका छन् । सन्दीपले १८ औं ओभरको पहिलो बलमा डोकरेललाई कुशल भुर्तेलबाट २८ रनमा क्याच गराउँदै आफ्नो टि२० आई करिअरको ५० औं विकेट पूरा गरेका थिए ।

टि२० आईमा सर्वाधिक छिटो ५० विकेट पूरा गर्ने कीर्तिमान श्रीलंका पूर्व स्पिनर अजन्था मेन्डिसको नाममा छ । उनले २६ खेलमा ५० विकेट लिएका थिए । दोस्रो स्थानमा आयरल्यान्डका मध्य गतिका बलर मार्क आदिर छन् । उनले २८ खेलमा त्यस सफलता हात पारेका थिए ।

सर्वाधिक छिटो ५० विकेट लिने तेस्रो बलरको विश्व कीर्तिमान राख्ने छन् । दक्षिण अफ्रिका इमरान ताहिर र राशिद खानले ३१–३१ खेलमा ५० विकेट पूरा गरेका थिए । उक्त कीर्तिमान तोड्दै सन्दीप विश्वकै तेस्रो बलर बनेका छन् ।

सन्दीपले अफगानिस्तानका राशिद खान, दक्षिण अफ्रिका इमरान ताहिर, डेल स्टेन, भारतका जस्प्रित बुमराह, युजभेन्द्र चहल, अष्ट्रेलिया मिचेल स्टार्क, श्रीलंका लासिथ मलिङ्गा जस्ता विश्व चर्तित टि२० बलरलाई पछि पारेका छन् ।

चहलले ३४ खेल, डेल स्टेनले ३५ खेल, न्युजिल्यान्डका टे«न्ट बोल्टले ३६ खेल र मिचेल स्टार्कले ४० खेलमा उक्त सफलता हात पारेका थिए । त्यसैले सन्दीपले विश्व चर्चित बलरलाई पछि पार्ने निश्चित देखिन्छ । नेपालमा सन्दीपपछि करण केसीले ३३ खेलमा ४४ विकेट लिएका छन् । टि२० क्रिकेटमा भने ५० विकेट लिने पहिलो खेलाडी बसन्त रेग्मी हुन् । वसन्तले ४० टि२० खेलमा ५३ विकेट लिएका छन् ।