मस्कट (हाम्रो खेलकुद) – नेपालले चार देश सम्मिलित टि२० आई सिरिज अन्तर्गत अन्तिम खेल टेस्ट टोली आयरल्यान्डविरुद्ध पहिला फिल्डिङ गर्ने भएको छ । अल अमरेत क्रिकेट मैदानमा नेपालका कप्तान सन्दीप लामिछानेले टस जितेर पहिला फिल्डिङ गर्ने निर्णय लिँदै टोलीमा तीन परिर्तन गरेका छन् ।

नेपालले आजको खेलमा तीन टोलीमा परेको छ । नेपालले युएईसँगको खेलबाट साहब आलम, विवेक यादव र आरिफ शेखलाई बेन्चमा राखेको छ । अभिनाश बोहरा, कुशल मल्ल र कुशल भुर्तेल टोलीमा फर्किएका छन् । नेपालले आजको खेलमा पनि करण केसीलाई बेन्चमा राखेको छ । करण फिट नहुँदा प्लेइङ ११ मा नपरेका हुन् ।

नेपालले पहिलो खेलमा ओमानलाई ६ विकेटले पराजित गरेको थियो । युएईसँग २५ रनले पराजित भएको थियो । आयरल्यान्डले ओमानलाई ९ विकेटले हराउँदा युएईसँग १३ रनले स्तब्ध बनेको थियो । आयरल्यान्डसँगको खेलसँगै नेपालको आइसिसी टि२० विश्वकप ग्लोबल छनोट ए को लागि सम्पूर्ण तयारी पूरा हुनेछ ।

हेड टु हेड :

आयरल्यान्ड र नेपालबीच दुई टि२० आई खेल भएको छ । दुबै खेलमा आयरल्यान्डले विजयी भएको छ । २०१५ को टि२० विश्वकप ग्लोबल छनोटमा नेपाल आयरल्यान्डसँग ५३ रनमा अल आउट हुँदै ८ विकेटले पराजित भएको थियो । २०१९ मा पाँच देश सम्मिलित टि२० आई सिरिजमा नेपाल १३ रनले पराजित भएको थियो । १ सय ४६ रनको विजयी लक्ष्य पछ्याउनेक्रममा नेपाल १९.५ ओभरमा १ सय ३२ रनमा अल आउट भएको थियो ।

नेपालको प्लेइङ ११ :

सन्दीप लामिछाने (कप्तान), आसिफ शेख (विकेटकिपर), कुशल भुर्तेल, ज्ञानेन्द्र मल्ल, दीपेन्द्रसिंह ऐरी, कुशल मल्ल, लोकेश बम, अभिनाश बोहरा, जितेन्द्र मुखिया, शरद भेषावकर र कमलसिंह ऐरी ।