एजेन्सी – इन्डियन प्रिमियर लिग (आइपिएल) २०२२ मेगा अक्सनमा आइतबार बेंगलोरमा सम्पन्न भएको छ । ६ सय खेलाडी सहभागी अक्सनबाट २ सय ४ खेलाडी खेलाडी १० फ्रेन्चाइज टोलीमा अनुबन्धित भएका छन् ।

अक्सनमा यस पटक सर्वाधिक महँगो मूल्य भारतीय विकेटकिपर ईशान किशनलाई मुम्बईले १५ करोड २५ लाख भारु खर्चेको थियो । जुन अक्सनमा विकेटकिपरले पाएको सर्वाधिक बढी रकम हो । तीव्र गतिका बलिङ अलराउन्डर दीपक चाहरलाई चेन्नईले १४ करोड भारु खर्चियो ।
यस पटक अक्सनमा तीव्र गतिका बलिङ अलराउन्डर बढी प्राथमिकतामा रहे । फ्रेन्चाइज टोलीले भारतीय युवा खेलाडीलाई बढी प्राथमिकतामा राखे ।

सिंगापुरका टिम डेविडलाई मुम्बई इन्डियन्सले ८ करोड भारुमा किनेको थियो । सबै फ्रेन्चाइजले अलरान्डरमा बढी ध्यान दिएका थिए । अक्सनमा सुरेश रैना, इमरान ताहिर, स्टिभ स्मिथ, ओईन मोगर्न, सकिब अल हसन, मुजिब उर रहमान, कोलिन मुनरो, अमित मिश्रा, एन्ड्रयु टाई, मार्टिन गुप्टिल लगायतका थुप्रै स्टार खेलाडी अक्सनमा बिकेनन् । आइपिएल अक्सनमा नबिकेका चार देशका कप्तान यस प्रकार छन् ।

४. सन्दीप लामिछाने ( नेपाल)

नेपाली क्रिकेट टोलीका कप्तान सन्दीप लामिछाने आइपिएल अक्सनमा बिकेनन् । न्यूनतम मूल्य ४० लाख भारु राखेका सन्दीपलाई कुनैपनि टोलीले लिन इच्छा देखाएनन् । कमजोर ब्याटिङ र फिल्डिङको कारण सन्दीपलाई नबिनेका हुन् । सन्दीपले पहिलो पटक २०१८ मा दिल्लीबाट आइपिएल खेलेका थिए । २०१८ मा तीन खेलमा ५ र २०१९ मा ६ खेलमा ९ विकेट लिएका थिए । २०२० मा पुरै बेन्चमा राखेको थियो । २०२१ मा फुकुवा गरेपछि सन्दीप अक्सनमा बिक्न सकेका छैनन् ।

३. दासुन शनका (श्रीलंका)

श्रीलंका युवा कप्तान दाशुन शनका पनि आइपिएलमा बिक्न सकेनन् । शनकाले आइपिएलमा न्युनतम मूल्य शनकाले ५० लाख भारु न्युनमत मूल्य राखेका थिए । फेन्चाइजले अलराउन्डरलाई प्राथमिकतामा राखेपनि उनी बिक्न सकेनन् । युवा अलराउन्डर शनकाले ब्याटिङ र बलिङ दुवैमा राम्रो प्रदर्शन गर्दै आएका छन् ।

दाशुनको कप्तानीमा श्रीलंकाले पनि राम्रो गर्दै आएको छ । शनकाले मध्यगतिसँगै राम्रो ब्याटिङ गर्ने गर्दछन् । उनले १ सय ३५ टि२० खेलमा ३ शतकसहित २ हजार ७ सय ८६ रन बनाउनुको साथै ३७ विकेट लिएका छन् । श्रीलंका लेगस्पिनर वानिन्दु हसरंगालाई बेंगलोरले १० करोड ७५ लाखमा विकेका थिए ।

२. ओईन मोर्गन (इंग्ल्यान्ड)

इंग्ल्यान्डका सर्वाधिक सफल कप्तान ओईन मोर्गनलाई यस पटक कुनैपनि फ्रेन्चाइज टोलीले मूल्य लगाएनन् । मोर्गनले न्यूनतम मूल्य १.५ करोड भारु राखेका थिए । २०२१ मा उनकै कप्तानीमा कोलकता नाइट राइडर्सले फाइनल यात्रा तय गरेको थियो । बायाँ हाते ब्याटर मोर्गन मध्यक्रमका भरपर्दा ब्याटर हुन् ।

तर पछिल्लो समय उनको प्रदर्शन अपेक्षा अनुसार भने छैन । २०१९ मा उनको कप्तानीमा इंग्ल्यान्डले पहिलो पटक एकदिवसिय विश्वकप उपाधि जितेको थियो । कप्तानको रुपमा समेत फ्रेन्चाइज टोलीले किन्न सक्ने अनुमान गरिएको थियो । तर बिकेनन् । २०२१ को अक्सनमा कोलकताले ५ करोड २५ लाख भारुमा किनेको थियो ।

१. आरोन फिन्च (अष्ट्रेलिया)

२०२१ का टि२० विश्वकप च्याम्पियन कप्तान तथा ओपनर आरोन फिन्चलाई कुनैपनि टोलीले किनेनन् । फिन्चले अक्सनमा न्यूनतम मूल्य १ करोड ५० लाख भारु राखेका थिए । सबै फ्रेन्चाइजले भारतीय ओपनरलाई प्राथमिकतामा राखेपछि फिन्च बिक्न सकेनन् । फिन्च टि२० क्रिकेटमा आक्रामक ब्याटरको रुपमा चर्चित छन् । टि२० आईमा एकै खेलमा सर्वाधिक रन १ सय ७२ रन उनको नामामा छ ।