मस्कट (हाम्रो खेलकुद) – रोहन मुस्तफाको अलराउन्ड प्रदर्शनको सहयोगमा चार देश सम्मिलित टि२० आई सिरिजमा टेस्ट टोली आयरल्यान्ड युनाइटेड अरव इमिरेट्स (युएई) सँग १३ रनले पराजित भएको छ ।

१ सय ७९ रनको विजयी लक्ष्य पछ्याएको आयरल्यान्डले निर्धारित २० ओभरमा ७ विकेट गुमाउँदै १ सय ६५ रन बनायो । ओपनर पाउल स्टर्लिङ १ रनमा रन आउट भएका थिए । एन्डी बालबर्नी २७ बलमा २ चौका र ३ छक्कासहित ४२ रनमा क्याच आउट भए । ग्यारेथ डेलानी २० बलमा ५ चौका र २ छक्कासहित ४० रनमा आउट भए ।

कर्टिस क्याम्फर ४० र लोर्कान टकरले २२ रन बनाए । तीव्र गतिका बलर जहुर खानले डेथ ओभरमा लगातार योर्करका साथ उत्कृष्ट बलिङ गरेपछि युएईले आयरल्यान्डलाई हराउन सफल भएको हो । युएईका स्पिनर पलानियापन मयप्पनले सर्वाधिक २ विकेट लिए । रोहन मुस्तफा र जहुर खानले १–१ विकेट लिए ।

त्यसअघि अल अमरेत क्रिकेट मैदानमा टस हारेर पहिला ब्याटिङ थालेको युएईले निर्धारित २० ओभरमा ५ विकेट गुमाउँदै १ सय ७८ रन बनाएको थियो । युएईका रोहन मुस्तफाले ४३ बलमा ६ चौका र १ छक्कासहित सर्वाधिक ५४ रन बनाए । वृत्य अरविन्दले ३६ बलमा ३ चौका र २ छक्कासहित ५० रनको योगदान दिए ।

कासिफ दाउद ११ बलमा ३ चौका र २ छक्कासहित २८ रनमा अविजित रहे । दाउदले अन्तिम ओभरमा मार्क आदिरलाई अन्तिम ओभरमा २ चौका र २ छक्कासहित २३ रन जोडेका थिए । आयरल्यान्डका क्रेग योंगले ४ ओभरमा २८ रन खर्चेर ४ विकेट लिए ।

युएईले पहिलो खेलमा नेपाललाई २५ रनले हराएको थियो । तेस्रो तथा अन्तिम खेल सोमबार घरेलु टोली ओमानसँग खेल्नेछ । ओमान पहिलो खेलमा नेपालसँग ६ विकेट र दोस्रो खेलमा आयरल्यान्डसँग ९ विकेटले पराजित भएको थियो । नेपाल र आयरल्यान्डले पनि सोमबार खेल्नेछन् ।