काठमाडौं (हाम्रो खेलकुद) – नेपाली राष्ट्रिय क्रिकेट टोलीका कप्तान सन्दीप लामिछाने इन्डियन प्रिमियर लिग (आइपिएल) को मेगा अक्सनमा सहभागी छन् । सन्दीप सम्मिलित समूह अनक्याप्ड स्पिनरको समूह अझै आएको छैन ।

सन्दीपको नाम क्रम संख्या ९४ मा छ । उनी अक्सनको ११ औं समूहमा रहेका छन् । यस समूहमा सिनियर राष्ट्रिय टोलीबाट नखेलेका स्पिनरहरुको नाम रहेको छ । सन्दीप एसोसिएट टोलीको स्टार रहेकाले उनलाई पनि यसै समुहमा राखिएको छ । अफगानिस्तानका स्पिनर नुर अहमदको नाम पनि यसै समूहमा छ ।

यसपटक आइपिएल अक्सनमा स्पिनरमाथि खासै रकम खर्च भएको छैन । अनुभवी स्पिनरहरु इमरान ताहिर र अमित मिश्रामाथि कुनै टोलीले बोली लगाएनन् । त्यस्तै कुलदिप यादव पनि २ करोडमा विक्री भए । त्यस्तै अष्ट्रेलियाका एडम जाम्पा, इंग्ल्यान्डका आदील राशिद र अफगानिस्तका मुजिब उर रहमान पनि बिकेका छैनन् । नाम चलेका लेग स्पिनरमा हालसम्म बोली नलागेकोले पनि सन्दीपको सम्भावना रहन सक्छ । अर्कोतर्फ लेग स्पिनर कुनै टोलीले नचाहेको अनुमान पनि लगाउन सकिन्छ ।

सन् २०१८ मा तत्कालिन दिल्ली डेयर डेभिल्स (दिल्ली क्यापिटल्स) ले न्यूनतम मूल्य २० लाख भारु अक्सनमा किनेपछि सन्दीप आइपिएल खेल्ने पहिलो नेपाली खेलाडी बनेका थिए । २०२० सम्म दिल्लीमा रहेका सन्दीपले ९ खेल खेल्दै १३ विकेट लिएका थिए । २०२१ मा भने दिल्लीले सन्दीपलाई फुकुवा गरेको थियो । तर अक्सनमा सन्दीपलाई कुनै पनि टोलीले रुचि देखाएनन् ।

सन् २०१८ मा दिल्लीले लिगबाट बाहिरिएपछि अन्तिम तीन खेलमा मौका दिँदा सन्दीपले ५ विकेट लिएका थिए । २०१९ मा ६ खेलमा सन्दीपले ९ विकेट लिएका थिए । २०२० मा भने पुरै बेन्चमा बसेर फर्किएका थिए । मेगा अक्सनमा सन्दीपले ४० लाख भारु अर्थात ६४ लाख नेपाली रुपैयाँ न्यूनतम मूल्य राखेका थिए । २०२१ को अक्सनमा भने सन्दीप विकेका थिएनन् ।

यो पनि : सन्दीप आइपिएलमा बिक्ने पाँच आधार