सुबास हुमागाईं, मस्कट

नेपाली राष्ट्रिय क्रिकेट टोलीमा खेलाडीलाई विशेष क्यापले सम्मान गरिने भएको छ । हरेक खेलपछि टोलीको ब्याटिङ, बलिङ र फिल्डिङमा उच्च प्रदर्शन गर्ने खेलाडीलाई गोल्डेन क्यापले सम्मान दिने टोलीले निर्णय गरेको छ ।

त्यसै अनुरुप शनिबार यूएईविरुद्ध खेलअघि प्रशिक्षक पुबुदु दासानायकेले टिम हडलमा ओमानविरुद्ध उत्कृष्ट प्रदर्शन गरेका ब्याटर दीपेन्द्रसिंह ऐरी र बलर अभिनाष बोहोरालाई गोल्डेन क्याप दिने घोषणा गरे । दीपेन्द्रले गोल्डेन ब्याटर तथा अभिनाषले गोल्डेन बलरको क्याप पाएका थिए । दीपेन्द्रलाई ज्ञानेन्द्र मल्लले उक्त क्याप हस्तान्तरण गरेका थिए भने अभिनाषले करणको हातबाट क्याप पाए ।

प्रशिक्षक दासानायकेले टोलीमा उच्च प्रदर्शन गर्ने खेलाडीसँग उक्त क्याप रहने बताए । क्याप टोलीका कोहीपनि खेलाडीले प्राप्त गर्न सक्ने र अर्को खेलाडीले राम्रो प्रदर्शन गरेमा हस्तान्तरण गर्नुपर्ने जानकारी दिए । फिल्डिङको लागि पनि क्याप रहेको जनाउँदै प्रशिक्षक दासानायकेले हाललाई उक्त क्यापको लागि हकदार कोहि नभएको बताए ।

यूएईविरुद्ध लोकेश बमलाई डेब्यू क्याप दिएपछि पुबुदुले यो जानकरी दिएका थिए । टिममा आन्तरिक प्रतिस्पर्धा बढेको अवस्थामा एक अर्काको मनोबल बढाउन सहयोग गर्ने लक्ष्यसाथ यो कदम चालिएको बुझिएको छ ।

यसअघि टिमले नै एक आपसमा छलफल गरेर ‘राइनोज’ मन्त्र निर्माण गरेको थियो । टोलीको हरेक खेलाडी र अफिसियलको प्रशिक्षण जर्सीमा यो राखिएको छ ।

यो पढ्नुहोस : ओमानमा क्रिकेट टोलीको ‘राइनोज’ मन्त्र