एजेन्सी – भारतीय तीव्र गतिका बलर दीपक चाहरलाई इन्डियन प्रिमियर लिग(आइपिएल) २०२२ को मेगा अक्सनमा चेन्नई सुपर किंग्सले धनको वर्षा गरेको छ । चेन्नईले आफ्ना तीव्र गतिका बलर दीपक चाहरलाई टोलीमा फर्काउन १४ करोड भारु खर्चेको छ ।

अक्सनमा चेन्नई, राजस्थान रोयल्स र दिल्ली क्यापिटल्सबीच कडा प्रतिस्पर्धा भएको थियो । अन्तिममा चेन्नईले किनेको हो । चाहर नयाँ बलका साथ स्विंग र तल्लोक्रममा राम्रो ब्याटिङको क्षमता राख्छन् । चाहरले आइपिएलमा हालसम्म ६३ खेलमा ५९ विकेट लिएका छन् ।

चाहरले पछिल्लो समय भारतीय क्रिकेट टोलीमा तल्लोक्रममा राम्रो प्रदर्शन समेत गर्दै आएका छन् । आइपिएल २०२१ को उपाधि चेन्नईलाई जिताउन दीपक चाहरले महत्वपूर्ण प्रदर्शन गरेका थिए ।

चाहरलाई २०१८ को अक्सनमा चेन्नईले ८० लाख भारुमा किनेको थियो । उनले ८० लाखबाट १४ करोडमा चेन्नईमा फर्किएका हुन् । चेन्नईले यस सिजनमा चार खेलाडीको रुपमा महेन्द्रसिंह धोनी, रविन्द्र जडेजा, मोईन अली र ऋतुराज गायकवाडलाई राखेको थियो । आइपिएल अक्सनमा सर्वाधिक महँगो भारतीय खेलाडीको रुपमा विक्ने चाहर तेस्रो खेलाडी हुन् ।

यसअघि २०१५ मा दिल्ली डेयर डेभिल्सले युवराज सिंहलाई १६ करोडमा किनेको थियो । जारी अक्सनमा मुम्बईले ईशा किशनलाई १५ करोड २५ लाख भारुमा किनेको छ ।