मस्कट (हाम्रो खेलकुद) – नेपालले चार देश सम्मिलित टि२० आई सिरिज अन्तर्गत युएईविरुद्ध पहिलो सफलता हात पारेको छ । अल अमरेत क्रिकेट मैदानमा टस हारेर पहिला ब्याटिङ गरि रहेको युएईले सुरुवाती तीन ओभरमा १ विकेट गुमाएर ३३ रन बनाएको छ ।

युएईका चिराग सुरी ५ बलमा १ चौका र १ छक्कासहित १० रनमा । अर्का ओपनर मोहम्मद वासिम १३ बलमा १ चौका र २ छक्कासहित २२ रनमा क्याच आउट भए ।

स्पिनर साहब आलमको बलमा लगातार तेस्रो छक्का हान्ने धुनमा वासिम तेस्रो ओभरको तेस्रो बलमा लङअफमा दीपेन्द्रसिंह ऐरीबाट क्याच आउट भएका थिए । रोहन मुस्तफा क्रिजमा छन् । स्पिनर साहब आलमले तेस्रो ओभरमा तीन छक्का र एक चौकासहित २२ रन खर्चिदा एक विकेट लिएका हुन् ।

नेपालले आजको खेलमा टोलीमा तीन परिवर्तन गरेको छ । युवा विष्फोटक ब्याटर लोकेश बम, स्पिनर साहब आलम र तीव्र गतिका बलर जितेन्द्र मुखियालाई आजको खेलमा मौका दिएको छ ।

ओमानसँग खेलमा प्रमुख तीन विकेट लिएका अभिनाश बोहरा र डेब्यू खेलमा ३ ओभरमा ३६ खर्चेका सागर ढकाल र १४ बल खेलेर ४ रनमा आउट भएका प्रदीप ऐरी बेन्चमा बसेका छन् ।

नेपालले आजको खेलमा पनि करण केसी, कुशल भुर्तेल र कुशल मल्ललाई भने दोसो खेलमा पनि बेन्चमै राखेको छ । नेपालले पहिलो खेलमा ओमानलाई ६ विकेटले हराएको थियो । नेपालले आजको खेलमा युवा ब्याटर लोकेश बमलाई डेब्यू दिएको छ । बमलाई नेपाली क्रिकेट टोलीका अनुभवी ब्याटर शरद भेषावकरले डेब्यू क्याप दिएका हुन् । बमले आसिफसँग ओपनिङ गर्ने सम्भावना छ ।