मस्कट (हाम्रो खेलकुद) – नेपाली क्रिकेट टोलीका लेगस्पिनर तथा कप्तान सन्दीप लामिछाने टि२० आई क्रिकेटमा कीर्तिमानी ५० विकेटको दौडमा छन् ।

आज चार देश सम्मिलित टि२० आई सिरिज अन्तर्गत ओमानसँग हुने खेलमा तीन विकेट लिए सन्दीप नेपालबाट टि२० आई क्रिकेटमा ५० विकेट लिने पहिलो खेलाडी बन्नेछन् । आजको खेलमा लिन नसकेपनि नेपालबाट ५० विकेट लिने दौडमा सन्दीप धेरै अघि छन् । सन्दीप टि२० आईमा सर्वाधिक छिटो ५० विकेट लिने विश्व कै दोस्रो बलरको दौडमा समेत छन् । सन्दीप डेब्यू कप्तानीमा उक्त सफलताका साथ नेपाललाई जितको साथ यादगार र सानदार सुरुवात गर्न चाहन्छन् ।

सन्दीपले २६ टि२० आई खेलमा ४७ विकेट लिएका छन् । सन्दीपले टि२० आईमा २०१८ मेमा नेपालबाट नभएर विश्व-११ बाट वेस्टइन्डिजविरुद्ध डेब्यू गरेका थिए । सन्दीपले नेपालका लागि २५ टि२० आई खेल खेलेका छन् । टि२० आईमा सर्वाधिक छिटो ५० विकेट पूरा गर्ने कीर्तिमान श्रीलंका पूर्व स्पिनर अजन्था मेन्डिसको नाममा छ । उनले २६ खेलमा ५० विकेट लिएका थिए ।

दोस्रो स्थानमा आयरल्यान्डका मध्य गतिका बलर मार्क आदिर छन् । उनले २८ खेलमा त्यस सफलता हात पारेका थिए । सन्दीपले आजको खेलमा तीन विकेट लिएमा सर्वाधिक छिटो ५० विकेट लिने दोस्रो बलरको विश्व कीर्तिमान राख्ने छन् । आजको खेलमा विकेट विहीन बनेपनि सन्दीपले अफगानिस्तानका राशिद खान, दक्षिण अफ्रिका इमरान ताहिर, डेल स्टेन, भारतका जस्प्रित बुमराह, युजभेन्द्र चहल, अष्ट्रेलिया मिचेल स्टार्क, श्रीलंका लासिथ मलिङ्गा जस्ता विश्व चर्तित टि२० बलरलाई पछि पार्ने भने निश्चित छ ।

इमरान ताहिर र राशिद खानले ३१–३१ खेलमा उक्त सफलता हात पारेका थिए । चहलले ३४ खेल, डेल स्टेनले ३५ खेल, न्युजिल्यान्डका टे«न्ट बोल्टले ३६ खेल र मिचेल स्टार्कले ४० खेलमा उक्त सफलता हात पारेका थिए । त्यसैले सन्दीपले विश्व चर्चित बलरलाई पछि पार्ने निश्चित देखिन्छ । नेपालमा सन्दीपपछि करण केसीले ३३ खेलमा ४४ विकेट लिएका छन् ।

सोमपाल कामीले ३३ खेलमा ३१, बसन्त रेग्मीले १८ खेलमा २५, अभिनाश बोहराले २४ खेलमा २२ र ललितनारायण राजवंशीले १२ खेलमा १० विकेट लिएका छन् । अन्य नेपाली बलरले टि२० आईमा दोहोरो अंकको आकँडा छुन सकेका छैनन् ।

टि२० क्रिकेटमा भने ५० विकेट लिने पहिलो खेलाडी बसन्त रेग्मी हुन् । वसन्तले ४० टि२० खेलमा ५३ विकेट लिएका छन् । नेपाल र ओमानबीचको खेल दिउँसो ३:४५ मा अल अमरेत मैदानमा सुरु हुनेछ ।

यो पनि : कप्तानीमा विलियम्सनलाई पछि पार्दै सन्दीप

सन्दीप नेपालको १० औं कप्तान बन्दै