एजेन्सी – युनाइटेड अरव इमिरेट्स (युएई) ले आइसिसी क्रिकेट विश्वकप लिग-२ अन्तर्गत नेपाल, पपुवा न्युगिनीसँग त्रिकोणात्मक ओडिआई सिरिज आयोजना गर्ने भएको छ । युएईले नेपाल र पपुवा न्युगिनीसँग त्रिकोणात्क ओडिआई सिरिज मार्च तेस्रो साता आयोजना गर्ने जनाइएको छ।

नेपाल क्रिकेट संघ (क्यान) का क्रिकेट म्यानेजर विनोद दासले उक्त त्रिकोणात्मक सिरिज हुने पुष्टि गरेका छन् । त्रिकोणात्क सिरिजको तालिका भने भने सार्वजनिक हुन बाँकी रहेको दासले बताए ।

‘ पपुवा न्युगिनी, नेपाल र युएईबीच हुने भनिएको हो । हामीलाई अहिले कुरा भए अनुसार मार्चमा मध्य समयमा हुने भनिएको छ । तर तालिका भने सार्वजनिक गरेको छैन’ , दासले हाम्रो खेलकुदसँग भने ।

तालिका बाहिरिए अनुसार नेपाल, युएई र पपुवा न्युगिनीबीच मार्च १५ देखि २२ सम्म शारजाह क्रिकेट स्टेडियम दुबईमा हुने बताइएको छ ।
नेपालले आइसिसी विश्वकप लिग–२ मा हालसम्म दुई त्रिकोणात्मक सिरिज खेलेको छ । नेपालले २०२० मा घरेलु मैदान टियुमा ओमान र अमेरिकासँग खेलेको थियो । गत असोजमा ओमानमा ओमान, नेपाल र अमेरिकाबीच त्रिकोणात्मक ओडिआई सिरिज भएको थियो ।

नेपाल आइसिसी विश्वकप लिग–२ मा ८ खेलमा ४ मा जित र ४ मा हार सहित छैटौं स्थानमा छ । २०२३ सम्म चल्ने विश्वकप लिग–२ का शीर्ष तीन टोलीले सोझैं त्यसै वर्ष हुने एकदिवसिय विश्वकप छनोटमा स्थान बनाउने छन् । बाँकी चार टोलीले प्लेअफ खेल्नुपर्ने हुन्छ ।

अंक तालिका

ओमान २२ खेलमा १४ खेलमा जित र ७ मा हार सहित २९ अंक जोड्दै शीर्षस्थानमा छ । स्कटल्यान्ड १२ खेलमा ७ मा जित र ३ मा हार सहित १६ अंकका साथ दोस्रो स्थानमा छ । अमेरिका १६ खेलमा ७ मा जित र ९ मा हार सहित तेस्रो स्थानमा छ । युएई ९ खेलमा ५ मा जित र ३ मा हारसहित ११ अंकका साथ चौथो स्थाानमा छ । नामिबिया ९ खेलमा १० अंकका साथ पाँचौं स्थानमा छ । नेपाल ८ खेलमा ४ मा जित र ४ मा हारसहित ८ अंकका साथ छैटौं स्थानमा छ । पपुवा न्युगिनी १२ खेलमा १२ मानै हारका साथ पुछारमा छ ।