एजेन्सी – इन्डियन प्रिमियर लिग (आइपिएल) विश्वको सर्वाधिक लोकप्रिय र मूल्य पाउने फ्रेन्चाइज लिग हो । व्यावसायिक क्रिकेटमा आइपिएल खेल्ने विश्वका सबै खेलाडीको चाहना हुन्छ । अझ एसोसिएट खेलाडीको लागि आइपिएल एउटा सपना नै हो ।

तर अष्ट्रेलिया तथा विश्वका चर्चित तीव्र गतिका बलर मिचेल स्टार्कले भने पछिल्लो समय आइपिएल अक्सनमै नाम दर्ता गराएका छैनन् । फेब्रुअरी दोस्रो साता हुने आइपिएल मेगा अक्सन २०२२ मा पनि उनले आफ्नो नाम दर्ता गराएका छैनन् । आइपिएलमा विदेशी तीव्र गतिका बलरमाथि पैसाको वर्षा नै हुने गर्दछ । भारतमा तीव्र गतिका बलरको विकल्प कम रहेकाले पनि अक्सनमा विदेशी बलरमाथि टोलीहरु मोटो रकम खर्चने गर्छन ।

आइपिएल लिलामीमा सर्वाधिक मूल्य तीव्र गतिका बलरमाथि नै लागेको छ । २०२० को आइपिएल अक्सनमा अष्ट्रेलिया अर्का तीव्र गतिका बल प्याट कमिन्सलाई कोलकता नाइट राइडर्सले १५ करोड ५० लाख भारुमा अनुबन्ध गरेको थियो । २०२१ मा राजस्थान रोयल्सले दक्षिण अफ्रिका तीव्र गतिका बलर क्रिस मोरिसलाई आइपिएल इतिहासकै सर्वाधिक महँगो मूल्य १६ करोड २५ लाख भारुमा अनुबन्ध गरेको थियो ।

मिचेल स्टार्क पनि अक्सनमा महँगो मूल्यमा विक्न सक्ने सम्भावना बोकेका खेलाडी हुन् । तीव्र गति र सटिक योर्कर स्टार्कको खुबी हो । स्टार्कले लगातार १ सय ५० प्रतिघण्टा किलोमिटरको गतीमा बलिङ गर्न सक्ने खुबी भएका खेलाडी हुन् । योर्करका लागि माहिर छन् । स्टार्कले आफ्नो करिअरकै उत्कृष्ट गति १६०.४ प्रतिघण्टा किलोमिटर छ ।

फ्रेन्चाइज टोली पनि स्टार्क अनुबन्ध गर्न चाहन्छन् । तर स्टार्कले पछिल्लो चार सिजनमा लगातार आफ्नो नाम अक्सनमै दर्ता गराएनन् । स्टार्कले आइपिएलमा आफ्नो नाम नदिनु बारे जवाफ पनि दिएका छन् ।

‘म आइपिएल लिलामीमा प्रवेश गर्नबाट एक बटन टाढा थिए । तर म व्यक्तिगत रुपमा २२ हप्ता भन्दा बढी बबलमा बिताउन चाहन्न । आइपिएल खेलेपछि शरीरलाई ताजा बनाउन केहि समय चाहिन्छ । मैले हाललाई अष्ट्रेलियालाई प्राथमिकतामा राखेको छु’, स्टार्कले इएसपिएन क्रिकइन्फोलाई भनेका छन् ।

त्यसैमा उनले थपे, ‘एक समय आउने छ, जब म आइपिएलमा फर्कन्छु । तर म धेरै भन्दा धेरै अष्ट्रेलियाबाट खेल्न चाहन्छु । दुई भन्दा बढी फर्म्याट खेल्दा विश्राम पनि चाहिन्छ । म बायो बबलबाट ८ हप्ता बाहिर रहेको समय परिवार र एलिसालाई दिन चाहन्छु’, उनले भनेका छन् । अष्ट्रेलिया महिला क्रिकेट टोलीकी ओपनर तथा विकेटकिपर एलिसा हेली स्टार्ककी श्रीमती हुन् ।

स्टार्कले अन्तिम पटक २०१८ मा अक्सनमा नाम दिएका थिए । उनलाई कोलकता नाइट राइडर्सले ९ करोड ४० लाख भारुमा अनुबन्ध गरेको थियो । त्यो समय स्टार्कलाई किन्न कोलकता र पन्जाबबीच कडा प्रतिस्पर्धा भएको थियो । तर स्टार्कले चोटका कारण आफ्नो नाम फिर्ता लिएका थिए । त्यसपछि स्टार्कले अक्सनमा आफ्नो नाम दिएका छैनन् । सन् २०१९ मा एकदिवसिय विश्वकपलाई देखाउँदै नाम फिर्ता लिएका थिए । पछिल्ला दुई सिजनमा स्टार्कले परिवारलाई समय दिन र शारीरिक फिट राख्न आइपिएल नखेलेको बुझिन्छ ।