एजेन्सी – अष्ट्रेलियाका विष्फोटक ब्याटर ग्लेन म्याक्सवेलले बिग ब्यास लिग इतिहासकै उत्कृष्ट ब्याटिङ प्रदर्शन गरेका छन् । मेलबर्न स्टार्सका ब्याटर म्याक्सवेलले होबार्ट हरिकेन्सविरुद्ध बिग ब्यास इतिहासकै सर्वाधिक १ सय ५४ रनको अविजित इनिङ खेले ।

मेलबर्न क्रिकेट ग्राउन्डमा टस हारेर ब्याटिङ थालेको स्टार्सले निर्धारित २० ओभरमा २ विकेट गुमाउँदै २ सय ७३ रन बनायो । ग्लेन म्याक्सवेल ६४ बलमा २२ चौका र ४ छक्कासहित १ सय ५४ रनमा अविजित रहे । यो विग ब्यास इतिहासमा एक खेलाडीले एक खेलमा बनाएको सर्वाधिक रन हो ।

म्याक्सवेलले मार्कस स्टोइनिसको कीर्तिमान तोडेका हुन् । मेलबर्न स्टार्सका मार्कस स्टोइनिसले गतवर्ष सिड्नी सिक्सर्सविरुद्ध १ सय ४७ रनको अविजित इनिङ खेलेका थिए । स्टोइनिसपछि होबार्टका म्याथ्यु वेडले १ सय ३० रनको अविजित इनिङ २०२० मा एडिलेड स्ट्राइकर्सविरुद्ध खेलेका थिए । जारी सिजनमा म्याक्सवेलको दोस्रो शतक हो ।

यसअघि गत डिसेम्बरमा म्याक्सवेलले सिड्नी सिक्सर्सविरुद्ध १ सय ३ रनको शतकीय इनिङ खेलेका थिए । त्यस्तै यस योगफल बिग ब्यास इतिहासकै सर्वाधिक ठूलो योगफल पनि हो । यसअघि बिग ब्यासमा उच्च योगफल सिड्नी थन्डरले सिड्नी सिक्सर्सविरुद्ध गतवर्ष ५ विकेट गुमाउँदै २ सय ३२ रन बनाएको थियो ।

जो क्लार्क १८ बलमा १ चौका र ३ छक्कासहित ३५ रनमा आउट भए । पहिलो विकेटका लागि जो क्लार्क र ग्लेन म्याक्सवेलले ७ ओभरमा ९७ रनको साझेदारी गर्दै उत्कृष्ट सुरुवात दिलाएका थिए । तेस्रो विकेटका लागि ग्लेन म्याक्सवेल र मार्कस स्टोइनिसले १ सय ३२ रनको उत्कृष्ट शतकीय साझेदारी गरेका थिए ।

स्टोइनिसले ३१ बलमा ४ चौका र ६ छक्कासहित ७५ रनमा अविजित रहे । सन्दीपले ४ ओभरमा ५२ रन खर्चिदा कुनैपनि विकेट लिन सकेनन् । जोश खान र जोर्डन थोम्पसनले १–१ विकेट लिए ।