काठमाडौं (हाम्रो खेलकुद) – नेपाल एपिएफ क्लबले प्रधानमन्त्री कप टि२० राष्ट्रिय क्रिकेट प्रतियोगिता फाइनलमा नेपाल पुलिस क्लबविरुद्ध खराब सुरुवात गरेको छ । टियु क्रिकेट मैदानमा टस हारेर ब्याटिङको निम्तो पाएको एपिएफले सुरुवाती ११ ओभरमा ६ विकेट गुमाउँदै ८१ रन बनाएको छ ।

एपिएफमा शरद भेषावकर ८ रनमा अविजित छन् । तेस्रो नम्बरका ब्याटर लोकेश बमले आक्रामक ब्याटिङका साथ राम्रो सुरुवात दिलाएपनि बाँकी १९ रन जोड्न चार विकेट गुमाएपछि दबाबमा परेको छ । तीव्र गतिका बलर गुलशन झाको दोस्रो ओभरको दोस्रो बलमा ओपनर आसिफ शेख एज लागेर विकेटकिपर दीलिप नाथबाट ९ रनमा क्याच आउट भए ।

स्पिनर सागर ढकालको चौथो ओभरको चौथो बलमा लोकेशले ब्यक्तिगत २६ रनमा जीवनदान पाए । डिप विकेटमा गुलशन झा ले सहज क्याच ड्रप गरेका थिए । सागरले अन्तिम बलमा प्रदीप ऐरी ७ रनमा बोल्ड आउट गर्दा एपिएफ ४३–२ को अवस्थामा थियो ।

दीपेन्द्र सिंह ऐरीको पाँचौं ओभरको पहिलो बलमा ठूलो सट खेलेका लोकेश बम लङअनमा अनिल शाहबाट २७ रनमा क्याच आउट भए । लोकेशले १५ बलमा १ चौका र ३ छक्का प्रहार गरे ।

लोकेशले सेमिफाइनलमा त्रिभुवन आर्मी क्लबविरुद्ध १४ बलमै अर्धशतक प्रहार गरेका थिए । समूह चरणमा बागमती प्रदेशविरुद्ध लोकेशले २१ बलमा अर्धशतक प्रहार गरेका थिए ।

सागरको छैटौं ओभरको अन्तिम बलमा दीपक बोहरा स्लिपमा ६ रनमा आरिफ शेखबाट क्याच भएपछि एपिएफले खराब सुरुवात गरेको थियो । दीपेन्द्रको बलमा पुरन विक शून्यमा आरिफ शेखबाट क्याच भएपछि ६.२ ओभरमा एपिएफ ६२–५ को अवस्थामा पुगेको थियो ।

सन्दीप जोरा २० बलमा २ चौका र १ छक्कासहित २४ रनमा आउट भए । सन्दीप दीपेन्द्रकै बलमा सागरबाट क्याच भएका थिए ।