एजेन्सी – भारतीप सुपरस्टार अलराउन्डर हार्दिक पान्ड्या र अफगानिस्तानका विश्व चर्चित लेग स्पिनर राशिद खान इन्डियन प्रिमियर लिग (आइपिएल) नयाँ फ्रेन्चाइज टोली अहमदाबादमा अनुबन्ध भएका छन् । इएसपिएनका अनुसार अहमदाबादले आइपिएल मेगा अक्सन अघि टोलीमा तीन खेलाडी अनुबन्ध गरेको छ ।

हार्दिक, राशिद र भारतीय युवा ओपनर शुभमन गिललाई अहमदाबादले अनुबन्ध गरेको छ । यस वर्ष अहमदाबाद र लखनउ थपिका दुई नयाँ फ्रेन्चाइज लिग हुन् । आठ पुराना फ्रेन्चाइज लिगले नियम अनुसार खेलाडी अनुबन्ध गरिसकेका छन् ।

आइपिएल नियम अनुसार पुराना फ्रेन्चाइज टोलीले बढीमा चार विदेशी खेलाडी टोलीमा राख्न पाउँछन् । दुई नयाँ फ्रेन्चाइज टोलीले बढीमा तीन खेलाडी अक्सन अघि टोलीमा राख्न पाउँछन् । जसमा दुई भारतीय र एक विदेशी खेलाडी हुनुपर्छ ।

तीन खेलाडी टोलीमा अनुबन्ध गर्दा पहिलो खेलाडीलाई १५ करोड, दोस्रोलाई ११ करोड र तेस्रोलाई ७ करोड खर्चन सक्छन् । लखनउ र अहमदाबादले औपचारिक रुपमा टोलीमा रहने खेलाडी भने टुङ्गो लगाएका छैनन् । दुई फ्रेन्चाइज टोलीले २२ जनवरी सम्म खेलाडी सार्वजनिक गर्ने समय पाएका छन् । लखनउको कप्तानी लोकेश राहुलले गर्ने चर्चा छ । अहमदाबादको कप्तानी हार्दिकले गर्ने उच्च सम्भावना रहेको बुझिएको छ ।

इएसपिएनका अनुसार हार्दिक र राशिद दुबैलाई अहमदाबादले १५–१५ करोडमा अनुबन्ध गरेको जनाएको छ । गिललाई ७ करोडमा अनुबन्ध गरेको छ । आइपिएलमा आफ्नो टोली निर्माण गर्न एक टोलीले बढीमा ९० करोड भारु खर्चन पाउँछ । अहमदाबादसँग अक्सनमा ५३ करोड भारु उपलब्ध हुनेछ ।

हार्दिक र राशिद पहिलो पटक सँगै फ्रेन्चाइज लिगबाट खेल्नेछन् । मुम्बईका सुपरस्टार हार्दिकलाई यस सिजन टोलीबाट फुकुवा गरेको थियो । त्यस्तै राशिदलाई सनराइजर्स हैदराबाद र गिललाई कोलकता नाइट राइडर्सले यस सिजन टोलीबाट फुकुवा गरेको थियो । राशिदलाई २०१८ मा हैदराबादले ९ करोड भारुमा अनुबन्ध गरेको थियो । हार्दिकलाई मुम्बईले २०१८ मा ११ करोड भारुमा टोलीमै राखेको थियो । गिललाई २०१८ मा कोलकताले १ करोड ८० लाख भारुमा अनुबन्ध गरेको थियो ।

मुम्बईले २०१५, २०१७, २०१९ र २०२० मा उपाधि जित्दा हार्दिकले महत्वपूर्ण अलराउन्ड प्रदर्शन गरेका थिए । मुम्बईले रोहित शर्मा, जस्प्रित बुमराह, सूर्यकुमार यादव र काइरन पोलार्डलाई अनुबन्ध गर्दा हार्दिकलाई फुकुवा गरेको थियो । पुराना आठ टोलीले बढीमा चार मात्र विदेशी खेलाडी राख्न पाउँछन् ।

हार्दिकले पछिल्लो समय फिटनेसमा संघर्ष गरेका छन् । पछिल्लो आइपिएलमा उनले बलिङ गरेका थिएनन् । भारतीय टोलीमा स्थान बनाउन पनि संघर्ष गर्दै आएका छन् । टि२० विश्वकप पछि हार्दिक टोलीमा छैनन् ।

राशिदले आइपिएलमा हैदराबादबाट डेब्यू गरेपछि ७६ खेल खेल्दै ९३ विकेट लिई सकेका छन् । आइपिएल अक्सन आगमी फेब्रुअरी दोस्रो साता हुने चर्चा छ । तर आइपिएलले आधिकारीक रुपमा पुष्टि भने गरेको छैन । यस सिजन देखि आइपिएलमा १० टोली हुनेछन् । नेपालबाट लेगस्पिनर सन्दीप लामिछानेको सम्भावना छ ।