काठमाडौं (हाम्रो खेलकुद) – प्रधानमन्त्री कप टि२० राष्ट्रिय प्रतियोगितामा शनिबार (आज) हुने पहिलो खेल नेपाल पुलिस क्बल र प्रदेश १ बीचको खेल खेलाडीमा कोरोना आशंकापछि स्थगित भएको छ ।

खेल शनिबार विहान टियु मैदानमा विहान ९ बजे हुने तय थियो । तर प्रदेश १ का खेलाडीमा कोरोना आशंका भएपछि खेल आजको लागि स्थगित भएको नेपाल क्रिकेट संघ (क्यान) ले जनाएको छ । क्यानका केन्द्रिय सदस्य दुर्गाराज पाठकका अनुसार खेलाडीमा आज कोरोना परिक्षण हुनेछ । त्यसपसछि आइतबार नतिजा आएपछि थाहा हुने बताए ।

‘प्रदेश १ का खेलाडीमा कोरोना लक्ष्यण देखिएपछि उनीहरुको आग्रहमै परिक्षण गर्न लागेको हो । किनभने विभागीय टोलीमा सिनियर टोलीका खेलाडीहरु पनि बढी छन् । प्रदेश १ का खेलाडीहरुको आजनै परिक्षण हुनेछ’, पाठकले भने ।

खेलमा अंक बाँड्ने वा पुन खेलाउने प्रदेश १ का खेलाडीको पिसिआर परिक्षणको नतिजापछि मात्र थाहा हुनेछ । पुलिस ३ खेलमा अपराजित रहँदै समूह एको विजेता रुपमा समेमिफाइनलमा पुगि सकेको छ । प्रदेश १ ले बाँकी दुबै खेलमा विशाल जित निकालेको खण्डमा त्रिभुवन आर्मी क्लब बाहिरिन सक्छ ।

आजनै हुने दोस्रो खेलमा बागमती र गण्डकीबीचको खेल भने टियुमा निर्धारित समयमै हुनेछ । खेल दिउँसो १ : १५ मा हुनेछ । बागमती विजयी भएको खण्डमा शीर्ष दुईमा रहँदै सेमिफाइनलमा पुग्नेछ । समूह बी बाट एपिएफ अपराजित रहँदै सेमिफाइनलमा पुगि सकेको छ ।