काठमाडौं (हाम्रो खेलकुद) – ओपनर प्रदीप ऐरी र आसिफ शेखको अर्धशतकको सहयोगमा नेपाल एपिएफ क्लबले प्रधानमन्त्री कप टि२० राष्ट्रिय प्रतियोगितामा विजयी सुरुवात गरेको छ । समूह बी को एपिएफले प्रदेश २ लाई २४ रनले हराउँदै विजयी सुरुवात गरेको हो ।

१ सय ६४ रनको विजयी लक्ष्य पछ्याएको प्रदेश २ ले २० ओभरमा ९ विकेट गुमाउँदै १ सय ३९ रन बनायो । प्रदेश २ का आदिल आलमले १४ बलमा २ चौका र ४ छक्कासहित ३५ रनको आक्रामक इनिङ खेले । ओपनर हरिशंकर शाहले २६ बलमा ७ चौकासहित सर्वाधिक ३६ रन बनाए । अन्य कुनै पनि ब्याटरले राम्रो प्रदर्शन गर्न सकेनन् । विवेक यादव १३, सन्तोष कार्की ४, सुरज पटेल १५, महबुब आलम १ र हासिम अन्सारीले ५ रन बनाए । कुमार थापा १० र प्रथिक यादवले ६ रन बनाए ।

एपिएफका तीव्र गतिका बलर कमलसिंह ऐरी, अभिनाश बोहरा र भुवन कार्कीले २–२ विकेट लिए । शरद भेषावकर र किशोर महतोले १-१ विकेट लिए । त्यसअघि टियु क्रिकेट मैदानमा टस जितेर ब्याटिङ रोजेको एपिएफले निर्धारित २० ओभरमा ५ विकेट गुमाउँदै १ सय ६३ रन बनायो । एपिएफका आसिफ शेखले ४५ बलमा ३ चौका र ५ छक्कासहित सर्वाधिक ६३ रनको योगदान दिए । अर्का ओपनर प्रदीप ऐरीले ४८ बलमा ९ चौकासहित ६० रनको अर्धशतकीय इनिङ खेले ।

एपिएफलाई ओपनर आसिफ र प्रदीपले पहिलो विकेटका लागि १४.२ ओभरमा १ सय २० रनको शतकीय साझेदारीका साथ राम्रो सुरुवात दिलाएका थिए । सन्दीप जोरा १७, शरद भेषावकर ९, लोकेश बम शून्य र कमलसिंह ऐरीले १ रन बनाए ।

प्रदेश २ का तीव्र गतिका बलर रुपेश सिंहले ४ ओभरमा २५ रन खर्चेर सर्वाधिक ४ विकेट लिए । विवेक यादवले १ विकेट लिए । एपिएफले दोस्रो खेलमा टियुमा मंगलबार दिउँसो बागमती प्रदेशसँग खेल्नेछ । प्रदेश २ ले मुलपानीमा दिउँसो गण्डकी प्रदेशसँग खेल्नेछ ।