काठमाडौ (हाम्रो खेलकुद) – त्रिभुवन आर्मी क्लबले सोमबारबाट सुरुहुने प्रधानमन्त्री कप टि२० राष्ट्रिय क्रिकेट प्रतियोगिता खेल्ने १४ सदस्य टोली घोषणा गरेको छ ।

विनोद भण्डारीको कप्तानीमा घोषणा टोलीमा बागमती प्रदेशका अलराउन्डर सोनु तामाङ, लुम्बिनी प्रदेशका तुलबहादुर थापा र इन्द्रकमल मानन्धर छन् । तीव्र गतिका बलर करण केसी र विकेटकिपर राजु रिजालले आर्मी छाडेपछि टोलीमा परिवर्तन गरेको हो । करण नेपाल पुलिस र रिजाल सुदूरपश्चिममा गएका छन् ।

त्यस्तै मध्यक्रमका ब्याटर भीम सार्कीले बायाँ हातको बुढी औंलामा चोटका कारण प्रधानमन्त्री कप गुमाउने भएका छन् । पहिलो पटक राष्ट्रिय प्रतियोगिता खेल्न लागेका तुलबहादुर तल्लोक्रममा राम्रो ब्याटिङसँगै मध्यक्रममा बलिङ गर्ने गर्दछन् ।

शीर्षक्रमका ब्याटर इन्द्रमानले आर्मीको टोलीमा पूनरागमन गरेका हुन् । सोनु पछिल्लो समय बागमतीको टोलीमा स्थान बनाउन सकेका थिएनन् । सोनु फिनिसर हुन् । आर्मीको टोलीमा विनोदसँगै, सोमपाल कामी र कुशल मल्ल जस्ता टि२० विशेष खेलाडी छन् । त्यस्तै पछिल्लो समय राम्रो लयमा रहेका राजेश पुलामी मगर पनि टोलीमा छन् ।

प्रधानमन्त्री कप पुष २६ देखि माघ ५ सम्म मुलपानी र टियुमा हुनेछ । आर्मी, नेपाल पुलिस क्लब, कर्णाली, प्रदेश १ र सुदूरपश्चिम छन् । समूह बी मा एपिएफ, बागमती, लुम्बिनी, गण्डकी र प्रदेश २ छन् । हरेक समूह शीर्ष दुई दुई टोलीले सेमिफाइनलमा स्थान बनाउने छन् । उद्धघाटन खेलमा आर्मी र कर्णालीबीच टियुमा प्रतिस्पर्धा हुनेछ ।

आर्मीको टोली :

विनोद भण्डारी (कप्तान), हरि चौहान, विक्रम सोब, राजेश पुलामी मगर, सोमपाल कामी, शाहब आलम, सुशान भारी, रोहित कुमार पौडेल, जितेन्द्र मुखिया, इन्द्रकमल मानन्धर, आकाश चन्द, सोनु तामाङ, तुलबहादुर थापा मगर र कुशल मल्ल ।

प्रशिक्षक – चन्द्र साउद

व्यवस्थापक – सागर सम्शेर थापा

आर्मीको खेल तालिका

पुष २६ (१०जनवरी) – कर्णालीसँग, टियु (विहान)

पुष २७ (११जनवरी – पुलिससँग, टियु (विहान)

पुष २९ (१३ जनवरी) – प्रदेश १ सँग, मुलपानी (विहान)

पुष ३० (१४जनवरी) – सुदूरपश्चिमसँग, मुलपानी (विहान)