काठमाडौं (हाम्रो खेलकुद) – युवा स्टार ब्याटर लोकेश बमले सोमबारदेखि काठमाडौंमा सुरु हुने प्रधानमन्त्री कप टि२० राष्ट्रिय प्रतियोगिता नेपाल एपिएफ क्लबबाट खेल्ने भएका छन् । सुदूरपश्चिम प्रदेशका आक्रामक ब्याटर लोकेशले गतवर्ष प्रधानमन्त्री कप र काठमाडौं मेयर्स कप त्रिभुवन आर्मी क्लबबाट खेलेका थिए ।

लोकेशले मेयर्स कप पछि त्रिभुवन आर्मी क्लब छोडेका थिए । आर्मीमा नौं महिना ट्रेनिङ गर्नु गाह्रो पर्ने हुँदा छाडेको उनले बताए । अहिले उनको एपिएफमा रोजगारको लागि प्रक्रियामा छ । लोकेशले प्रधानमन्त्री कप आफूलाई राष्ट्रिय टोलीको बन्द प्रशिक्षणमा पर्ने एउटा राम्रो अवसर रहेको बताउँछन् ।

‘ विश्वकप खेल्ने सबैको सपना हुन्छ । प्रधानमन्त्री कपमा राम्रो गर्दै सिनियर टोलीको बन्द प्रशिक्षणमा पर्ने सोच छ । यो मेरो लागि राम्रो अवसर हो । यसलाई सदुपयोग गर्न प्रयास गर्छु’, लोकेशले भने । लोकेश पछिल्लो समय राष्ट्रिय टोलीको बन्द प्रशिक्षणमा पर्दै आएपनि अन्तिम टोलीमा स्थान बनाउन सकेका छैनन् ।

प्रधानमन्त्री कप राष्ट्रिय टि२० प्रतियोगिता प्रदर्शनको आधारमा नेपालले विश्वकप ग्लोबल छनोट ए खेल्ने टोलीको बन्दलाई टोली बोलाउनेछ । ग्लोबल टि२० छनोट ए आगमी फेब्रुअरीमा ओमानमा हुँदै छ । क्यानले पहिलो चरणको ३० सदस्य टोली बन्द प्रशिक्षणमा बोलाउँदा लोकेश अटाएका थिएनन् ।

गतवर्ष आर्मी च्याम्पियन बन्दा लोकेशले ६ खेलमा १ सय २७ रन जोडेका थिए । काठमाडौं मेयर्स कपमा ४ खेलमा लोकेशले १ सय ९ रन बनाएका थिए । असोजमा भएको एभरेष्ट प्रिमियर लिग (इपिएल) मा पोखरा राइनोजबाट खेल्दा लोकेशको प्रदर्शन सम्झन लायक थिएन । इपिएलमा लोकेशले ६ इनिङमा ३१ रन मात्र बनाउन सकेका थिए ।

अघिल्लो महिना सम्पन्न यू-१९ राष्ट्रिय प्रतियोगिताबाट सुदूरपश्चिम प्रदेशबाट खेल्दै औसत प्रदर्शन गरेका थिए । पहिलो खेलमा प्रदेश २ विरुद्ध ८२ रनको इनिङ खेलेपनि त्यसपछि राम्रो प्रर्दशन गर्न सकेका थिएनन् । आक्रामक ब्याटर लोकेशलाई ठूलो इनिङ र उच्च प्रदर्शनको दबाब हुनेछ ।

विकेटकिपर समेत रहेका लोकेशले लोकेशले दोस्रो संस्करणको पोखरा प्रिमियर लिग (पिपिएल_ मा विराटनगर टाइटन्सबाट चितवन राइनोजविरुद्ध ३६ बलमा ६२ रन जोड्दै सबैको मन जितेका थिए । पिपिएलमा लोकेश मोष्ट भ्यालुबल खेलाडी चुनिएका थिए ।