काठमाडौं (हाम्रो खेलकुद)– एसिया कप खेल्न थाइल्यान्ड पुगेको नेपाली महिला क्रिकेट टोली बिहीबारको अभ्यास खेलमा घरेलु टोलीसँग १९ रनले पराजित भएको छ । ८३ रनको लक्ष्य पछ्याएको नेपाली टोलीले २० ओभरको खेलमा ५ बल अघि सबै विकेट गुमाउँदै नेपाली टोलीले ६३ रन मात्र बनाउन सक्यो ।

नेरी थापाबाहेक कुनै पनि खेलाडीले दोहोरो आँकडामा रन जोड्न नसकेपछि नेपालले पहिलो अभ्यास खेल गुमाएको थियो । २३ बल खेलेकी पूर्व कप्तान नेरीले १ चौका सहित १७ रन बनाइन् । कप्तान रुविना क्षेत्रीले ९ बलमा १ चौकासहित ५ रन जोडिन् । नेरी र रुविना बाहेकले चौका प्रहार गर्न सकेनन् । ओपनर काजल श्रेष्ठले खाता खोल्न सकिनन् भने ज्योति पाण्डेले १ रन बनाइन् । त्यस्तै सीता रानामगरले २, इन्दु बर्माले १, रश्मी शर्मा चौलागाईले ६, करुणा भण्डारीले ४, पूर्व कप्तान निरा राजोपाध्यायले ७ , सरिता मगरले ५ र रोशनी बोहोराले १ रन बटुलेकी थिइन् । थाइल्यान्डका लागि नाताया बोचाथाम, राताना पाडुंगेलेरो र रातानार्पोन साङसोमाले समान २ तथा सोराया लाथ र सेलिपोर्न लाउलले समान १ विकेट लिए ।

त्यसअघि टस जितेर ब्याटिङ रोजेको थाइल्यान्डले चानिदा सुथिरुङको अविजित ३५ रनको मद्दतमा ७ विकेट गुमाउँदै ८२ रन बनाएको थियो । ओपनर नाथाकानले १० र सिनामिन सेन्याले अविजित १० रन बनाउनुबाहेक घरेलु टोलीका लागि पनि दोहोरो अंकमा रन बनाउन सकेनन् । नेपालका लागि सरस्वती चौधरी, सीता रानामगर र करुणा भण्डारीले समान २ तथा रुविना क्षेत्रीले १ विकेट लिइन् ।