काठमाडौं (हाम्रो खेलकुद) – राष्ट्रिय क्रिकेट टोलीका स्पिनर ललितनारायण राजवंशीले खुट्टाको घुँडामा लागेको चोटको सफल शल्यक्रिया भएको छ ।

आइतबार ललितपुरको ग्वार्कोमा रहेको भएको बि एण्ड बी अस्पतालमा विहान १० बजे सफल शल्यक्रिया भएको हो । अहिले अवस्था सामान्य रहेको ललितले हाम्रो खेलकुदलाई जानकारी दिए । ललितको शल्यक्रिया चिकित्सक अमित जोशी टोलीले गरेको थियो ।

‘दुखाई जारी छ । अस्पताल कति दिन बस्ने भन्ने थाहा छैन । सोमबार यस विषयमा थाहा हुनेछ । मैदान फर्किन कित समय लाग्छ ठ्याक्कै भन्न सकिदैन । तर ८-९ महिना भनिएको छ’, ललितले भने ।

एक महिना अघि पुलिस एकेडेमीमा अभ्यासको क्रममा बायाँ खुट्टाको घुँडामा चोट लागेको थियो । शल्यक्रिया नगर्दा दीर्घकालिन रुपमा ठूलो असर पर्ने हुँदा ललितले शल्यक्रिया गरेका हुन् । बायाँ हाते स्पिनर ललितले नेपाल पुलिस क्लबबाट घरेलु क्रिकेट खेल्ने गर्दछन् । ललितले पछिल्लो पटक एभरेष्ट प्रिमियर लिग (इपिएल) ललितपुर प्याट्रियटर्सबाट खेलेका थिए ।

२०१९ मा आइसिसी एकदिवसिय विश्वकप छनोट अन्तर्गत जिम्बावेविरुद्ध नेपालको लागि ललितले डेब्यू गरेका थिए । पछिल्लो पटक ललितले आइसिसी विश्वकप लिग–२ त्रिकोणात्मक सिरिज अन्तर्गत अमेरिकाविरुद्ध खेल खेलेका थिए । त्यसपछि ललित टोली बाहिर थिए । ललितले नेपालबाट ४ ओडिआई, १२ टि२० आई, १२ लिष्ट ए र १ प्रथम श्रेणीको खेल खेलेका छन् ।