काठमाडौं (हाम्रो खेलकुद)- नोवेम्बर २६बाट सुरु हुने महिला एसिया कप क्रिकेट प्रतियोगिता खेल्न नेपाली महिला क्रीकेट टिम आज थाईल्याण्डतर्फ प्रस्थान गरेको छ । टिमलाई आज बिहानै राखेपका सदश्य सचिब केशब कुमार बिष्टले बिदाई तथा शुभकामना दिनु भएको थियो । 

संगिता राई पहिलो पटक महिला राष्ट्रिय टोलीमा पर्न सफल भएकी छिन् । त्यस्तै शोभा आलेले टोलीमा पुनरागमन गरेकी छिन् । टोलीका अन्य सदस्यमा सबनम राई, इन्दु बर्मा, ज्योति पाण्डे, सरस्वति चौधरी, रश्मि शर्मा, करुणा भण्डारी ,सरिता मगर, सिता रानामगर, नेरी थापा मगर, निरा राजोपाध्याय र रोशनी बोहरा छन् ।

चोटका कारण बन्द प्रशिक्षणमा पनि नरहेकी निर्मला शाही यसपटक टोलीमा छैनन् । निर्मला त्यो खेलाडी हुन जसले गत महिना हङकङमा भएको महिला विश्वकप एसियाली छनोटमा नेपालका लागि सर्वाधिक रन बनाउने दोस्रो खेलाडी बन्ने क्रममा ९३ रन जोड्नुका साथै ८ विकेट पनि लिएकी थिइन् । विश्वकप छनोटमा दोस्रो भएपछि नेपाल एसिया कपका लागि छनोट भएको थियो । विश्वकप छनोटका लागि डाकिएका खेलाडीनै यसपटकको बन्द प्रशिक्षणमा पनि थिए ।

एसिया कपको पहिलो दिन नेपालले टेस्ट मान्यता प्राप्त राष्ट्र पाकिस्तानको सामना गर्नेछ । प्रतियोगितामा त्यस्तै अन्य टेस्ट मान्यता प्राप्त सदस्य भारत, बंगलादेश, श्रीलंकासहित थाइल्यान्डको पनि सहभागिता छ ।
क्रिकेटमा मुख्य प्रशिक्षक जगत टमाटा, राष्ट्रिय महिला क्रिकेट टोलीका प्रशिक्षक राजु शाक्य र कप्तान रुबिना क्षेत्री खेलाडीको अन्तिम छनोट गरेका थिए ।