काठमाडौं (हाम्रो खेलकुद) – एसिसी यू१९ एसिया कपमा नेपालले पहिलो खेलमा बंगलादेशविरुद्ध मध्यम सुरुवात गरेको छ । शारजाह क्रिकेट स्टेडियम युएईमा टस जितेर ब्याटिङ रोजेको बंगलादेशले सुरुवाती २० ओभरमा २ विकेट गुमाउँदै ८४ रन बनाएको छ ।

बंगलादेशका मध्यक्रमका मोहम्मद प्रान्तिक नाबिल २२ र आइज मुल्ला १३ रनमा अविजित छन् । प्रान्तिक बंगलादेशले २०२० को यू१९ विश्वकप जित्दाका सदस्य समेत हुन् । बंगलादेशका ओपनर मोहम्मद महफिजुल ईस्लाम र इफ्ताखर हसन इफिट्ले पहिलो विकेटका लागि ११ ओभरमा ३९ रनको साझेदारी गर्दै औसत सुरुवात दिलाएका थिए । स्पिनर तिलकराज भण्डारीले ११ औं ओभरको अन्तिम बलमा ओपनर ईस्लामलाई विकेटकिपर अर्जुन साउदबाट १७ रनमा क्याच गराउँदै पहिलो सफलता दिलाए । ३३ बल खेलेका ईस्लामले २ चौका प्रहार गरे ।

१६ औं ओभरको अन्तिम बलमा एक रन लिनेक्रममा एक्स्ट्रा कभरबाट आदिल अन्सारीले नन स्ट्राइकमा सिधैं स्टम्प ताक्दै इफ्टिलाई २१ रनमा पेभेलिएन फर्काए । उनले ४५ बलमा २ चौका प्रहार गरे । तीव्र गतिका बलर गुलशन झाले ५ ओभरमा १७ र दुर्गेश गुप्ताले समान ओभरमा १८ रन खर्चिएका छन् । तिलक राज भण्डारीले ५ ओभरमा २९ रन खर्चेर १ विकेट लिएका छन् । बशिर अहमदले ५ ओभरमा २० रन खर्चेका छन् ।