एजेन्सी – घरेलु टोली अमेरिकाले पहिलो टि२० आई खेलमा आयरल्यान्डलाई २६ रनले पराजित गरेको छ । योसँगै दुई टि२० आई सिरिजमा अमेरिकाले १–० को अग्रता लिएको छ । फ्लोरिडामा टस जितेर ब्याटिङ रोजेको अमेरिकाले २० ओभरमा ६ विकेट गुमाउँदै १ सय ८८ रन बनाएको थियो ।

अमेरिकाका तल्लोक्रमका ब्याटर गजानन्द सिंहले ४२ बलमा ३ चौका र ५ छक्कासहित सर्वाधिक ६५ रनको योगदान दिए । सुशान्त मोदानीले ३९ बलमा ३ चौका र १ छक्कासहित ५० रन जोडे । खराब सुरुवात गर्नेक्रममा एक समय ४.२ ओभरमा १६–४ को अवस्थामा पुगेको अमेरिकालाई गजानन्द र सुशान्तले पाँचौं विकेटका लागि १ सय १० रनको कीर्तिमानी शतकीय साझेदारी गरेपछि बलियो योगफलमा पुगेको थियो ।

टि२० आईमा पहिलो पटक अमेरिकाका ब्याटरले शतकीय साझेदारी गरेका हुन् । मार्टि केनले १५ बलमा ३ चौका र ३ छक्का प्रहार गर्दै ३९ रनमा अविजित रहे । कप्तान मोनाक पटेल २, रयान स्कट ८ र जेभियर मार्शल ४ रनमा आउट भए ।

आयरल्यान्डका ब्यारी म्याकार्थीले ४ ओभरमा ३० रन खर्चेर ४ विकेट लिए । १ सय ८९ रनको विजयी लक्ष्य पछ्याएको आयरल्यान्डले निर्धारित २० ओभरमा ६ विकेट गुमाउँदै १ सय ६२ रन बनायो । आयरल्यान्डका शीर्षक्रमका ब्याटर लोर्कन टकरले ४९ बलमा ३ चौका र २ छक्कासहित ५७ रनमा अविजित रहे ।

ओपनर पल स्टर्लिङ १५ बलमा ६ चौका र १ छक्कासहित ३१ रनमा आउट भए । अन्य ब्याटरले राम्रो प्रदर्शन गर्न सकेनन् । अमेरिका सौरभ नेत्रवालकार, निसर्ग पटेल र अली खानले २–२ विकेट लिए । आयरल्यान्डको टि२० आई खेलमा यो ऐतिहासिक जित हो । कुनैपनि टेस्ट टोलीलाई अमेरिकाले टि२० आईमा पराजित गरेको पहिलो पटक हो । दोस्रो टि२० आई खेल शुक्रबार विहान हुनेछ । अमेरिका र आयरल्यान्डबीच तीन ओडिआई खेलको सिरिज पनि हुनेछ ।