एजेन्सी – भारतीय टेस्ट क्रिकेट टोलीका कप्तान तथा वर्तमान समयका विश्व क्रिकेटका एक उत्कृष्ट ब्याटर विराट कोहली दुई वर्षदेखि शतक विहीन छन् ।

भारत तीन टेस्ट सिरिजको लागि दक्षिण अफ्रिका भ्रमणमा छ । भारत र दक्षिण अफ्रिकाबीचको पहिलो टेस्ट २६ डिसेम्बरदेखि सुपर स्पोर्ट्स पार्कमा सुरु हुनेछ । दक्षिण अफ्रिकाविरुद्ध सिरिजमा भारतीय कप्तान विराट कोहलीको सोच शतकको खडेरी तोड्ने हुनेछ । कोहलीले टेस्टमा पछिल्लो पटक २०१९ नोभेम्बर २२ मा कोलकातामा बंगलादेशविरुद्ध १ सय ३६ रनको शतकीय इनिङ खेलेका थिए ।

त्यसपछि कोहलीले टेस्टमा शतक प्रहार गर्न सकेका छैनन् । कोहलीलाई शतकमा खडेरीनै लागेको छ । कोहलीले ओडिआईमा शतक प्रहार नगरेको दुई वर्ष भन्दा बढी भएको छ । पछिल्लो पटक कोहलीले २०१९ अगष्ट तेस्रो साता वेस्टइन्डिजविरुद्ध शतकीय इनिङ खेलेका थिए । त्यसयता कोहली ओडिआईमा शतक विहीन छन् । टि२० आई क्रिकेटमा कोहलीले हालसम्म शतक प्रहार गर्न सकेका छैनन् । इन्डियन प्रिमियर लिग (आइपिएल) मा रोयल च्यालेन्जर्स बेंगलोरका कप्तान कोहलीले पछिल्लो पटक २०१९ मा कोलकता नाइट राइडर्सविरुद्ध शतक प्रहार गरेका थिए ।

२०२१ मा कोहलीले १० टेस्ट खेलमा ४ अर्धशतकसहित कुल ४ सय ८३ रन बनाएका छन् । उत्कृष्ट प्रदर्शन ७२ रन छ । भारतले २०२१ को अन्तिम खेल २६ डिसेम्बरमा दक्षिण अफ्रिकासँग पहिलो टेस्ट खेल्नेछ । भारतीय क्रिकेट टोलीका कप्तान कोहलीको नजर दुई वर्षदेखि रहेको शतकको खडेरी तोड्ने हुनेछ । भारतले विराट कोहलीलाई टि२० आई र ओडिआई दुबै टोलीको कप्तानबाट हटाएको छ । टेस्ट कोहलीलाई उत्कृष्ट प्रदर्शनको दवाव पनि छ ।

इंग्ल्यान्डका कप्तान जो रुट, पाकिस्तानका बाबर आजम र न्युजिल्यान्डका कप्तान केन विलियम्सनले उत्कृष्ट प्रदर्शन गर्दै आएका छन् । अष्ट्रेलियाका स्टिभ स्मिथ र मार्नस लाबुसेनले पनि राम्रो प्रभाव जमाउँदै आएका छन् । त्यसले गर्दा कोहलीलाई शतकको दवाव झन धेरै देखिन्छ । कोहली टेस्ट वरीयतामा सातौं स्थानमा पुगेका छन् । जो रुट शीर्षस्थानमा छन् । ओडिआई वरियतामा पाकिस्तानका बाबर आजम शीर्षस्थान र कोहली दोस्रो स्थानमा छन् । ओडिआईमा शतक प्रहार गर्न नसकेपनि प्रदर्शन भने उत्कृष्ट रहँदै आएको छ ।