काठमाडौं (हाम्रो खेलकुद) – नेपाली यू–१९ टोलीका प्रशिक्षक वसन्त शाही ठकुरीले एसिसी यू–१९ एसिया कपमा नेपालको लक्ष्य सेमिफाइनल खेल्ने बताएका छन् । यू-१९ एसिया कप खेल्नुअघि शाहीले उक्त प्रतिक्रिया दिएका हुन् ।

‘हामीले छोटो समयलाई सदुपयोग गरेर राम्रो तयारी गर्यौै । वाई वाई यू-१९ राष्ट्रिय क्रिकेट प्रतियोगितामा राम्रो ब्याटिङ प्रदर्शन भएको थियो । विभागीय टोली नेपाल पुलिस क्लब र नेपाल एपिएफ क्लबसँगको तयारीले मनोबल झनै उच्च भएको छ’, प्रशिक्षक शाहीले भने ।

‘टिम सन्तुलित छ । सबैभन्दा ठूलो कुरा युवा खेलाडीहरुको समूह छ । यो भन्दा अघिको यू-१९ मा अन्तर्राष्ट्रिय अनुभव भएका खेलाडी समावेश हुन्थे । युवाहरुको जोश जाँगर बढी हुन्छ त्यसले पनि फाइदा बढी हुनेछ । अलिकति बेफाइदा भनेको अनुभवी खेलाडीहरु टोलीमा छैनन्’, उनले भने ।

यू–१९ राष्ट्रिय क्रिकेट प्रतियोगिताको कारण धेरै फाइदा भएको बताए । शाहीले यू–१९ राष्ट्रिय प्रतियोगिता लिगमा गराएकोमा नेपाल क्रिकेट संघ (क्यान) लाई धन्यावाद दिए । ‘पहिलो पटक सातै प्रदेश एक आपसमा खेले । क्रिकेटको विकाशको लागि राम्रो पक्ष हो । धेरै खेलहरु खेल्न पाए । हाम्रो कमजोरी ब्याटिङ मानिन्थ्यो । तर यसपटक धेरै रन बनेको छ । सबै कुरा लिगमा आयोजना गरेर हो । यू-१९ राष्ट्रिय प्रतियोगिताले तयारी गर्न सहज भयो,’ उनले भने ।

त्यसैमा शाहीले थपे, ‘टेस्ट टोलीको ग्रास रुटदेखिको विकास र संरचना नै धेरै फरक हुन्छ । टेस्ट टोली भएर हामीलाई मतलब भएन । हामीविरुद्ध एउटा टोली खेलेको छ भनेर मैदानमा खेल्ने छौं । हाम्रो पहिलो लक्ष्य टेस्ट टोलीलाई आश्चर्यचकित पार्दै सेमिफाइनल खेल्ने हुनेछ।’

‘ब्याटिङ हाम्रो बलियो पक्ष हो । हामीले विशेषत तीव्र गतिको बलिङमा काम गर्नुपर्छ । फिटनेस केहि कमजोरीको रुपमा छ’, उनले भने ।

टेस्ट राष्ट्र भनेपछि बलिया हुन्छन् नै । बंगलादेश त अझ साविक विश्वकप विजेता टोली हो । श्रीलंकाले लगातार अभ्यास खेलहरु खेल्दै आएको छ । उनीहरुले आफ्नो तयारी राम्रो गरेको छन् । उनीहरु एसिया कपलाई तयारीको रुपमा लिँदै विश्वकप खेल्न जानेछन् । हाम्रो पहिलो लक्ष्य सेमिफाइनल हुनेछ’, शाहीले विपक्षी टोली बारे भने ।

शाहीले यसअघि नेपाली यू-१६ टोलीलाई दुई अन्तर्राष्ट्रिय उपाधि जिताएका छन् । उनकै प्रशिक्षकमा लुम्बिनी प्रदेशले यस पटकको यू–१९ राष्ट्रिय प्रतियोगिता उपाधि जितेको थियो । उनले पहिलो पटक यू–१९ टोली सम्हाल्न लागेका हुन् । त्यसैले आफूलाई यो चुनौती र अवसर दुवै रहेको बताए ।

शाहीले नेपाली सिनियर टोलीको सहायक प्रशिक्षकको रुपमा पनि काम गरिसकेका छन् । अभ्यास खेलमा नेपाली यू-१९ टोलीले नेपाल पुलिस क्लबलाई ७ विकेटले हराएको थियो । दोस्रो खेलमा एपिएफसँग ३ विकेटले पराजित भएको थियो ।

यू-१९ एसिया कपमा नेपालसँगै बंगलादेश, श्रीलंका र कुवेत समूह बी मा छन् । समूह ए मा भारत, अफगानिस्तान, पाकिस्तान र युएई छन् । समूह ए का खेल दुबई र बी का खेल शारजाहमा हुनेछन् । यू-१९ एसिया कप पुष ८ देखि १६ गते सम्म (डिसेम्बर २३ देखि ३१ सम्म) युएईमा चल्नेछ ।

नेपालले पहिलो खेल पुष ८ (डिसेम्बर २३) मा बंगलादेशसँग शाहजाहमा खेल्नेछ । नेपालले पुष ११ (डिसेम्बर २६) मा श्रीलंका र पुष १३ (डिसेम्बर २८) मा कुवेतसँग खेल्नेछ । शीर्ष दुईमा रहन सके सेमिफाइनल खेल्नेछ । दुबै सेमिफाइनल पुष १५ (३० डिसेम्बर) मा हुनेछ । फाइनल पुष १६ (डिसेम्बर ३१ मा) हुनेछ ।

दुवै समूहका शीर्ष २-२ टोली सेमिफाइनलमा पुग्नेछन् । पहिलो सेमिफाइनल आइसिसी एकेडेमी ओभल १ मा र दोस्रो शारजाह क्रिकेट मैदानमा हुनेछ ।

नेपाली यू-१९ टोली :

देव खनाल (कप्तान), शेर मल्ल (उप-कप्तान), दीपेश कँडेल, विवेक यादव, गुलशन झा, विवेक रानामगर, सन्तोष कार्की, आदिल अन्सारी, तिलक राज भण्डारी, अर्जुन कुमाल, बशिर अहमद, दुर्गेश गुप्ता, प्रकाश जैसी, अर्जुन साउद र राहुल भण्डारी ।

प्रशिक्षक : वसन्त शाही ठकुरी

सहायक प्रशिक्षक : कलाम अली

एपीएफविरुद्ध यू-१९ टोलीका सन्तोषको विष्फोटक शतक

‘यू–१९ एसिया कपमा नेपालको लक्ष्य फाइनल’ – कप्तान देव