एजेन्सी – शीर्षक्रमका ब्याटर मार्नस लाबुसेनको शतक, डेविड वार्नर र स्टिभ स्मिथको अर्धशतकमा अष्ट्रेलियाले एशेज सिरिज अन्तर्गत दोस्रो टेस्ट खेलमा मजबुत प्रदर्शन गरेको छ । दोस्रो दिनको खेल सकिँदा सम्म घरेलु टोली अष्ट्रेलिया खेलमा हाबी बनेको छ ।

एडिलेड ओभलमा टस जितेर पहिला ब्याटिङ थालेको अष्ट्रेलियाले पहिलो इनिङमा दोस्रो दिन अन्तिम सेसनमा १५०.४ ओभरमा ४७३–९ को अवस्थामा इनिङ समाप्तिको घोषणा गर्यो । अष्ट्रेलियाका मार्नस लाबुसेनले ३ सय ५ बलमा ८ चौकासहित सर्वाधिक १ सय ३ रनको शतकीय इनिङ खेले ।

लाबुसेनको टेस्ट करिअरको छैटौं शतक हो । डेविड वार्नर १ सय ६७ बलमा ११ चौका सहित ९५ रनमा आउट भए । कप्तान स्टिभ स्मिथले २ सय १ बलमा १२ चौका र १ छक्कासहित ९३ रनको योगदान दिए । ओपनर मार्नस हरिस तीन रनमै आउट भएका थिए । दोस्रो विकेटका लागि लाबुसेन र वार्नरले १ सय ७२ रनको उत्कृष्ट शतकीय साझेदारी गरेका थिए । बेन स्टोक्सको बलमा स्टुअर्ट ब्रोडबाट क्याच भएपछि वार्नर शतक बनाउन पाँच रनले चुकेका थिए ।

लाबुसेनलाई ओली रोविन्सनले एलबीडब्लू आउट गरेका थिए । जेम्श एन्डरसनले एलबीडब्लू आउट गरेपछि स्मिथ शतक बनाउन सात रनले चुकेका थिए । विकेटकिपर एलेक्स केरीले १ सय ७ बलमा ५ चौका प्रहार गर्दै ५१ रनमा आउट भए । मिचेल स्टार्क ३९ बलमा ५ चौकासहित ३९ रनमा अविजित रहे । तल्लोक्रमका बलर माइकल नेसरले डेब्यू खेलमा २४ बलमा ५ चौका र १ छक्का प्रहार गर्दै ३५ रनमा आउट भए ।
इंग्ल्यान्डका बेन स्टोक्सले सर्वाधिक तीन विकेट लिए । जेम्श एन्डरसनले दुई, स्टुअर्ट ब्रोड, क्रिस वोक्स, ओली रोविन्सन र जो रुटले एक एक विकेट लिए ।

पहिलो इनिङमा इंग्ल्यान्ड ८.४ ओभरमा १७–२ को अवस्थामा दोस्रो दिनको खेल सकिएको छ । इंग्ल्यान्ड ४ सय ५६ रनले पछि छ । कप्तान जो रुट ५ र डेविड मलान एक रनमा अविजित छन् । ओपनर हसिब हमिद ६ र रोरी बन्स ४ रनमा आउट भए । अष्ट्रेलियाका माइकल नेसर र मिचेल स्टार्कले एक एक विकेट लिएका छन् । पाँच टेस्टको एशेज सिरिजमा अष्ट्रेलियाले १–० को अग्रता लिएको छ । पहिलो खेलमा अष्ट्रेलिया ९ विकेटले विजयी भएको थियो ।