काठमाडौं (हाम्रो खेलकुद) – नेपाल क्रिकेट संघ (क्यान) ले ज्ञानेन्द्र मल्ललाई कप्तानबाट हटाउनुको कारण नेतृत्व अक्षमता रहेको जनाएको छ । क्यानले बुधबार पूर्व कप्तान ज्ञानेन्द्र मल्ल र उपकप्तान दीपेन्द्रसिंह ऐरीलाई पदबाट हटाएको छ । सोही बैठकले स्पिनर सन्दीप लामिछानेलाई क्रिकेट टोलीको नयाँ कप्तान पनि नियुक्त गरेको थियो ।

क्यानको केन्द्रिय सम्झौता ग्रेड २०२१ को अन्तिम ६ महिनाको असहमती जनाउँदै मिडियामा गएर बोलेको भन्दै दीपेन्द्र, ज्ञानेन्द्र, तीव्र गतिका बलर सोमपाल कामी र कमलसिंह ऐरीलाई २०२२ को ६ महिना सम्झौतामा नराख्ने निर्णय गरेको छ । क्यानका कार्यवाहक सचिव प्रशान्त विक्रम मल्लले नेतृत्व अक्षमताले ज्ञानेन्द्रलाई कप्तानबाट हटाएको बताए ।

‘ज्ञानेन्द्रले नेतृत्वको रुपमा पुलको काम गर्नुपर्छ । क्यान र कप्तान भनेको एउटा पुल हो । कप्तानले पुलको काम गर्नुपर्छ । तर ठ्याक्कै उल्टो भूमिका देखियो । खेलाडी लगेर मिडियामा जाने । अन्य जुनियर खेलाडीलाई किन बोल्न लगाउने । तिनीहरुको त भविष्य छ नि । नेतृत्व एकदमै अक्षमता देखियो । त्यहिँ भएर कप्तान र उपकप्तानलाई कारबाही गरेको हो,’ क्यानका कार्यवाहक सचिव मल्लले भने ।

मल्लले सबैले अनुशासनमा रहनुपर्नेमा जोड दिए । उनले थपे,’अनुशासन विना कुनैपनि संस्था र संघ अघि बढ्न सक्दैन । खेलकुदमा झन् पहिलो प्राथमिकता हो । अनुशासन नै भएन । त्यसैले कारबाही गरेका हौं।’ कप्तान र उपकप्तानको जिम्मेवारी हटाएपछि खेलाडीका रुपमा खेल्नका लागि भने उनीहरु बन्देज नगरिएको पनि मल्लले प्रष्ट पारे ।

‘वहाँहरुले सम्झौता गरेको प्रत्रमा आर्टिक ३.३.१ मा स्पष्ट छ । क्यानको अनुमिती बिना, आइसिसी, एसिया र मिडियामा जार्दैनौं भनेर । स्पष्ट हुँदा हुँदै वहाँहरुले तोड्नुभयो । समितिले बुझाएको प्रतिबेदनको आधारमा बोर्डले कारबाही गरेको हो,’ क्यानका कार्यवाहक सचिव मल्लले भने,

सन्दीप टि२० क्रिकेटमा विश्वको स्टार हो । ६,७ वर्षदेखि नेपाली टोलीमा पनि खेलेको छ । अव उसको विश्व अनुभव पनि छ । मलाई ५–६ वर्षको लागि हेरेर नेतृत्वमा लिएको हो।’ सन्दीप टि२० मात्र कि ओडिआईको पनि कप्तान नियुक्त भएका हुन् भन्ने प्रश्नमा मल्लको जवाफ छ, त्यो निर्णय भएको छैन । अब टि२० छ । त्यसको लागि नियुक्त गरिएका छ । त्यसपछि अगाडिको सिरिज बारे बोेर्डले पछि निर्णय लिनेछ ।

२०७६ असोजमा पारस खड्काले कप्तानी छाडेपछि ज्ञानेन्द्रले क्रिकेट टोलीको नेतृत्व सम्हाल्लेका थिए । असोजमा आइसिसी विश्वकप लिग २ अन्तर्गत ओमान र अमेरिकासँग त्रिकोणात्मक ओडिआई सिरिज नै ज्ञानेन्द्रले नेतृत्व गरेको अन्तिम भ्रमण हो । उनको कप्तानीमा नेपालले खासै उल्लेखनिय उपलब्धि भने हात पार्न सकेन । नेपालले अब फेब्रुअरीमा ओमानमा आइसिसी ग्लोबल टि२० छनोट खेल्दैछ ।