काठमाडौं (हाम्रो खेलकुद) – ओपनर देव खनालको कप्तानीमा नेपालले एसिसी यू–१९ एसिया कप खेल्ने अन्तिम टिम घोषणा गरेको छ । घोषणा टोलीमा देवलाई कप्तान दिँदा स्पिन अलराउन्डर शेर मल्ललाई उपकप्तान दिएको छ ।

घोषणा टोलीमा घरेलु क्रिकेटमा राम्रो छाप छाडि सकेका अलराउन्डर विवेक यादव, दुर्गेश गुप्ता, नेपाली सिनियर टोलीबाट खेलि सकेका तीव्र गतिका बलर गुलशन झा र आक्रामक ब्याटर अर्जुन साउद लगायतका ब्याटर छन् ।

अघिल्लो साता यू१९ राष्ट्रिय प्रतियोगितामा लुम्बिनी प्रदेशलाई उपाधि दिलाउन देवले उत्कृष्ट ब्याटिङ र कप्तानी गरेका थिए । लुम्बिनीलाई उपाधि जिताउन कप्तान देव खनालले ७ खेलमा ४ अर्धशतक सहित कुल ३ सय ३४ रन बनाउँदै शीर्षस्थानमा रहेका थिए ।

समूह बी मा नेपालसँगै बंगलादेश, श्रीलंका र कुवेत छन् । समूह ए मा भारत, अफगानिस्तान, पाकिस्तान र युएई छन् । समूह ए का खेल दुबई र बी का खेल शारजाहमा हुनेछन् । यू-१९ एसिया कप पुष ८ देखि १६ गते सम्म (डिसेम्बर २३ देखि ३१ सम्म ) युएईमा चल्नेछ ।

नेपालले पहिलो खेल पुष ८ (डिसेम्बर २३) मा बंगलादेशसँग शाहजाहमा खेल्नेछ । नेपालले पुष ११ (डिसेम्बर २६) मा श्रीलंका र पुष १३ (डिसेम्बर २८) मा कुवेतसँग खेल्नेछ । शीर्ष दुईमा रहन सके सेमिफाइनल खेल्नेछ । दुबै सेमिफाइनल पुष १५ (३० डिसेम्बर) मा हुनेछ । फाइनल पुष १६ (डिसेम्बर ३१ मा) हुनेछ ।

दुबै समूह शीर्ष दुई दुई टोली सेमिफाइनलमा पुग्नेछन् । पहिलो सेमिफाइनल आइसिसी एकेडेमी ओभल १ मा र दोस्रो शारजाह क्रिकेट मैदानमा हुनेछ ।

नेपाली यू-१९ टोली :

देव खनाल (कप्तान), शेर मल्ल (उपकप्तान), दीपेश कँडेल, विवेक यादव, गुलशन झा, विवेक रानामगर, सन्तोष कार्की, आदिल अन्सारी, तिलक राज भण्डारी, अर्जुन कुमाल, बशिर अहमद, दुर्गेश गुप्ता, प्रकाश जैसी, अर्जुन साउद र राहुल भण्डारी ।

प्रशिक्षक : बसन्त शाही ठकुरी

टिम व्यवस्थापक : धर्मराज गिरी

आत्मविश्वास र स्तरीय ड्राइभका पर्याय देव

मुम्बई हुर्केर नेपालमा फक्रिएका अर्जुन