एजेन्सी – भारतले ओपनर रोहित शर्मालाई ओडिआई टोलीको कप्तानमा नियुक्त गरेको छ । टि२० आईको कप्तानी जिम्मेवारी दिई सकेको भारतले ओडिआईमा पनि रोहितलाई नियुक्त गरेको छ ।

भारतले विराट कोहलीलाई ओडिआई कप्तानबाट हटाउँदै रोहितलाई नयाँ कप्तान नियुक्त गरेको हो । रोहित अव भारतको ओडआई र टि२० आई दुबैको कप्तान बन्नेछन् । टेस्ट टोलीको कप्तानी भने कोहलीले नै गर्नेछन् । दक्षिण अफ्रिकासँग हुने तीन ओडिआई सिरिजमा भारतको नेतृत्व रोहितले गर्नेछन् । अघिल्लो महिना सम्पन्न टि२० विश्वकपसँगै कोहलीले कप्तानी छाडेका थिए । रोहितको कप्तानीमा भारतले अघिल्लो महिना घरेलु मैदानमा न्युजिल्यान्डसँगको तीन टि२० आईमा क्लिनस्विप गरेको थियो ।

कोहलीले २०१७ देखि भारतीय ओडिआई टोलीको कप्तानी गर्दै आएका थिए । कोहलीको कप्तानीमा भारत २०१९ को एकदिवसिय विश्वकपको सेमिफाइनलबाट बाहिरिएको थियो । कोहलीनै कप्तानीमा भारत २०१७ को च्याम्पियन्स ट्रफीको फाइनलमा पाकिस्तानसँग १ सय ८० रनको फराकिलो अन्तरले पराजित भएको थियो ।

कोहलीले ९५ ओडिआई खेलमा कप्तानी गर्दा ६५ मा जित र २७ मा हारको सामना गरेका थिए । एक खेल बराबरी र दुई खेल नतिजा विहीन थियो । कोहलीको अनुपस्थितीमा रोहितले १० ओडिआई खेलमा कप्तानी गरि सकेका छन् । ८ खेलमा जित र २ खेलमा हार बेहोरेका छन् । इन्डियन प्रिमियर लिग (आइपिएल) मा रोहितको कप्तानीमा मुम्बई इन्डियन्सले पाँच उपाधि जितेको छ ।

टेस्टको भने कोहलीले नै भारतको कप्तानी गर्ने छन् । अजिंक्या रहाणेलाई हटाउँदै टेस्टमा भारतले रोहितलाई उप-कप्तानको जिम्मेवारी दिएको छ । आइसिसी विश्व टेस्ट च्याम्पियन्ससिप अन्तर्गत भारतले दक्षिण अफ्रिकासँग तीन टेस्ट सिरिज खेल्नेछ । भारतले दक्षिण अफ्रिकासँग हुने तीन ओडिआई खेललाई टोली घोषणा गरेको छैन ।

भारतको टेस्ट टोली : विराट कोहली (कप्तान), रोहित शर्मा (उपकप्तान), लोकेश राहुल, मयंक अग्रवाल, चेतेश्वर पुजारा, अजिंक्या रहाणे, श्रेयस ऐर, हनुमा विहारी, ऋषभ पन्त (विकेटकिपर), ऋद्धिमान शाह (विकेटकिपर), रविचन्द्रन आश्विन, जयन्त यादव, ईशान्त शर्मा, मोहम्मद शामी, उमेश यादव, जस्प्रित बुमराह, शार्दुल ठाकुर र मोहम्मद शिराज ।

भारतके दक्षिण अफ्रिकासँग तीन टेस्ट खेल तालिका

पहिलो टेस्ट – डिसेम्बर २६-३०, सुपर स्पोर्ट्स पार्क

दोस्रो टेस्ट – जनवरी ३-७, जोहानेसबर्ग

तेस्रो टेस्ट – जनवरी ११-१५, केप टाउन

तीन ओडिआई सिरिज

पहिलो ओडिआई, १९ जनवरी : बोल्यान्ड पार्क

दोस्रो ओडिआई, २१ जनवरी : बोल्यान्ड पार्क

तेस्रो ओडिआई, २३ जनवरी : केप टाउन