एजेन्सी – भारतीय क्रिकेट टोलीका कप्तान विराट कोहली र चेतेश्वर पुजारा न्युजिल्यान्डसँगको दोस्रो टेस्ट खेलमा एकै ओभरमा डक आउट भएका छन् । वानखडे स्टेडियम मुम्बईमा टस जितेर पहिला ब्याटिङ थालेको भारतले राम्रो सुरुवातको बाबजुद प्रमुख दुई ब्याटरलाई एकै ओभरमा शून्यमा गुमाएको हो ।

स्पिनर अजाज पटेलले ३० औं ओभरमा दुई ब्याटरलाई शून्यमा पेभेलिएन पठाए । ३० औं ओभरको दोस्रो बलमा चेतेश्वर पुजालाई शून्यमा बोल्ड आउट गरे । पाँच बल खेलेका पुजाराले खाता खोल्न सकेनन् । अन्तिम बलमा विराट कोहली एलबीडब्लू धरापमा परे । चार बल खेलेका शून्यमा पेभेलिएन फर्के । पहिलो टेस्टमा विश्रामको कारण कोहली खेल खेलेका थिएनन् ।

वर्षाको कारण खेल ढिलो सुरु भएको थियो । ओपनर मयंक अग्रवाल र सुभमन गिलले २७.३ ओभरमा ८० रन जोड्दै राम्रो सुरुवात दिएथिए । पटेलले नै गिललाई रस टेलरबाट ४४ रनमा क्याच आउट भए । ७१ बल खेल्दै गिलले ७ चौका र १ छक्का प्रहार गरे ।

भारतले ४१ ओभरमा ३ विकेट गुमाउँदै १ सय २१ रन बनाएको छ । ओपनर मयंक अग्रवाल १ सय ३७ बलमा ७ चौका र २ छक्कासहित ५८ रनमा अविजित छन् । श्रेयस ऐरले ११ रनमा साथ दिएका छन् । दुई टेस्ट खेलको सिरिज अन्तर्गत पहिलो टेस्ट बराबरीमा सकिएको थियो ।