काठमाडौं (हाम्रो खेलकुद) – राष्ट्रिय क्रिकेट टोलीका स्पिनर सन्दीप लामिछानेले अन्तर्राष्ट्रिय फ्रेन्चाइज लिगमा पुनरागमनका लागि उत्साहित रहेको बताउँदै आफ्नो खेलमा तीन चार वटा भेरियसनले सधैं नहुने बताएका छन् । अघिल्लो साता बिग ब्यास लिग २०२१/२२ खेल्न अष्ट्रेलिया जानुअघि सन्दीपले उक्त प्रतिक्रिया दिएका हुन् ।

सन्दीपले यस सिजनको बिग ब्यास होबार्ट हरिकेन्सबाट खेल्दैछन् । गत सिजन होबार्टबाट खेलेका सन्दीपले त्यसअघि दुई संस्करण मेलबर्न स्टार्सबाट खेल्दै राम्रो प्रभाव छाडेका थिए । सन्दीप एक वर्षपछि फ्रेन्चाइज लिग खेल्दैछन् । अर्कोतर्फ सन्दीप विग ब्यास मार्फत नै झण्डै एक वर्षपछि फ्रेन्चाइज लिगमा फर्किदै छन् ।

यसपटक लिगलाई लिएर सन्दीप निकै उत्साहित देखिन्छन् । ‘फ्रेन्चाइज लिग नखेलेको एक वर्ष भईसक्यो । यसबीचमा नेपालका केहि प्रतियोगिता पनि खेलें । यस लिगलाई लिएर म निकै उत्साहित छु । किनभने राम्रो अवसर आएको छ । म मात्र नभएर राम्रो गर्न सके अन्य नेपाली खेलाडीलाई पनि राम्रो अवसर हो’, सन्दीपले भने ।

त्यसैमा उनले थपे, ‘ पछिल्लो समय सन्दीपले विदेशी फ्रेन्चाइज लिगको रुपमा बिग ब्यासनै खेलेका थिएँ । यसबीच एक वर्षमा जे भयो त्यो खासै सम्झन चाहन्न । त्यो फिर्ता आउने छैन । त्यसलाई छाडेर अब म सकरात्मक रुपमा अघि बढ्नेछु’।

पछिल्लो एक वर्षमा सन्दीपले पाकिस्तान सुपर लिग, इंग्ल्यान्डको टि२० ब्लास्ट र द हन्ड्रेन्डमा विभिन्न कारण क्वारेनटाइन बसेर पनि नखेली फर्किए । सन्दीप पछिल्लो एक वर्ष क्वारेनटाइनमा बढी बस्नुपर्यो । ‘ ७–८ दिन क्वारेनटाइमा हुँदा मलाई लाग्छ आफैंलाई विश्लेषण गर्ने एउटा राम्रो समय हुन्छ । कोठा बाहिर जान पाइएन । आफ्नो भिडियो हेर्न धेरै समय पाइन्छ । त्यो बाहेक अन्य गर्न सकेपनि हुन्छ । यो सिक्ने सहि समय हो । सबैको सोच्ने फरक समय हुन्छ’, उनले भने ।

‘तीन चार वटा भेरियसनले सधैं हुने वाला छैन । फिल्डिङ सेटिङ देखि खेलको सबै पक्षबारे जानकारी हुनुपर्छ । अगाडी ब्याटिङमा आउने खेलाडीले के सोचेको छ । त्यसका लागि आफ्नो भेरियसनमा के थप्न सकिन्छ । कहिले काहिँ एंगल दिएर होस् वा पिचको अवस्था प्रयोग गरेर, यी सबै सिक्ने कुरा हुन् ।’

‘सामान्य बलिङ गरेर नै मैले विकेट लिइरहेको छु र रन रोकेको छु भने एक्स्ट्रा गर्नुपर्ने आवश्यक हुँदैन । ओमानको सिरिजमा पनि मैले केहि फरक गर्न खोजेको थिइनँ । त्यहि मोमेन्टनलाई अघि लगेर जान चाहन्छु’ , सन्दीपले भने ।

गत असोजमा सन्दीपले आइसिसी विश्वकप लिग २ मा ओमान, अमेरिकासँग त्रिकोणात्मक सिरिज र पपुवा न्युगिनीसँगको दुई ओडिआई सिरिज गरि ६ खेलमा १८ विकेट लिँदै सनसनी मच्चाएका थिए । त्यसै उत्कृष्ट प्रदर्शनमा सन्दीपले आइसिसीको सेप्टेम्बरको प्लेयर अफ द मन्थको अवार्ड समेत जितेका थिए ।

अहिले प्रतिस्पर्धा भन्दा सन्दीप केहि सिक्न चाहन्छन् । ‘खेलनै यस्तो छ, हरेक दिन सिक्नुपर्ने हुन्छ । आफूले कहिल्यै पनि सबै कुरा जानेको सोच्नु हुँदैन । बिग ब्यासमा प्रतिस्पर्धा भन्दा पनि केहि राम्रो सिकेर आएँ भने नेपालको लागि फाइदा हुनेछ । यसलगत्तै ग्लोबल टि२० छनोट र विश्वकप लिग २ का खेलहरु छन्,’ उनले भने ।

नेपालले ग्लोबल टि२० विश्वकप छनोट खेल्दैछ । ग्लोबल छनोटको लागि टिम राम्रो रहेको सन्दीप बताउँछन् । ‘टिम राम्रो छ । हामीले धेरै खेल खेलेका छैनौं । इपिएलपछि धेरैले आफैं प्रशिक्षण गर्दै आउनु भएको छ । जति धेरै सकरात्मक भावना राख्न सक्यौं त्यति नै फाइदा हुनेछ । मलाई लाग्छ हामी विश्वकप ग्लोबल छनोटमा समूहको शीर्षस्थानमा रहन्छौं ।’

बिग ब्यास डिसेम्बर ५ देखि सुरु हुँदैछ । सन्दीपले यस सिजनमा पुरै खेल्न पाउने सम्भावना कम छ । नेपालले जनवरीमै घरेलु मैदानमा त्रिकोणात्मक सिरिजको लागि तयारी गरेको बुझिएको छ । सिरिज भएको खण्डमा सन्दीप बिग ब्यास पूरै खेल्न नपाउन सक्छन् । सन्दीपले गत वर्ष होबार्टबाट नै बिबिएल खेल्दै ८ खेलमा ८ विकेट लिएका थिए ।

त्यसअघिका दुई सिजन सन्दीपले मेलबर्न स्टार्सबाट खेलेका थिए । सन्दीपले नवौं संस्करणको बिबिएलमा मेलबर्न स्टार्सबाट १३ खेलमा १५ विकेट लिएका थिए । सन्दीपले पहिलो पटक सन् २०१८ मा मेलबर्न बाटै बिग ब्यास लिग खेलेका थिए । उक्त वर्ष सन्दीपले ८ खेलमा ११ विकेट हात पारेका थिए ।

पछिल्लो पटक सन्दीपले गत जनवरीमामा खेलेको बिग ब्यासनै अन्तिम फ्रेन्चाइज लिग हो । त्यसपछि सन्दीप आइपिएल अक्सनमा विकेनन् । पाकिस्तान सुपर लिग (पिएसएल) कोरोना कारण कराँची पुगेर फर्किएका थिए । टि२० ब्लास्ट र द हन्ड्रेड भिसाको कारण गुमाउनु परेको थियो । टिएर ५ भिसाको कारण द हन्ड्रेडको लागि सन्दीप बेलायतनै पुगेर फर्किएका थिए ।