काठमाडौं (हाम्रो खेलकुद) – आइसिसी वुमन्स टि२० विश्वकप एसिया क्षेत्र छनोटमा घरेलु टोली युएईले नेपाललाई १ सय २८ रनको कठिन लक्ष्य दिएको छ । आइसिसी एकेडेमी ग्राउन्ड नम्बर २ मा टस हारेर ब्याटिङ थालेको युएईले निर्धारित २० ओभरमा ५ विकेट गुमाउँदै १ सय २७ रन बनायो ।

युएईकी मध्यक्रमकी चमानी सेनेवित्नेले ३६ बलमा ७ चौका सहित सर्वाधिक ५२ रन बनाइन् । ओपनर थ्रीथा सतिस ४६ बलमा ३ चौका सहित ४७ रनमा आउट भइन् । ओपनर ईशा ओझालाई तीव्र गतिकी बलर कविता कुँवरले पहिलो ओभरको अन्तिम बलमा बोल्ड आउट गरेकी थिइन् । त्यसपछि थ्रीथा र ईशा इगोडागे ५८ रनको साझेदारी गर्दै अघि बढाएका थिए ।

काभिसा इगोडागे २७ बलमा १ चौका सहित २२ रनमा आउट भइन् । ११ औं ओभरको अन्तिम बलमा स्पिनर संगिता राईले कविता कुँवरबाट क्याच गराएकी थिइन् । त्यसपछि क्रिजमा आएकी चमानीले आक्रामक ब्याटिङका साथ चुनौतीपूर्ण योगफल तयार पारेकी थिइन् । तेस्रो विकेटका लागि थ्रीथा र चमानीले ४९ रनको साझेदारी गरेका थिए । थ्रीथालाई १८ औं ओभरको अन्तिम बलमा सीता रानामगरले बोल्ड आउट गरेपछि अर्धशतक बनाउन चुकेकी थिइन् ।

नेपालका कविता कुँवरले ४ ओभरमा २१ रन खर्चेर २ विकेट लिइन् । सबनम राई, सीता रानामगर र संगिता राईले १–१ विकेट लिए । शीर्ष स्थानमा रहँदै आगमी वर्ष हुने ग्लोबल छनोटमा स्थान बनाउन नेपाललाई जित्नै पर्ने हुन्छ ।