काठमाडौं (हाम्रो खेलकुद) – आइसिसी वुमन्स टि२० विश्वकप एसिया क्षेत्र छनोटमा नेपालले अन्तिम तथा निर्णायक खेल आज युएईसँग खेल्दैछ । नेपाल र युएईबीचको खेल मध्याहन्न ११ : १५ मा आइसिसी एकेडेमी नम्बर २ मा हुनेछ । आजको विजेता शीर्षस्थानमा रहँदै आगमी वर्ष हुने टि२० विश्वकप ग्लोबल छनोटमा स्थान बनाउनेछ ।

युएई ४ खेलमा ४ मानै जितका साथ शीर्षस्थानमा छ । घरेलु टोली युएई नेपाललाई स्तब्ध बनाउँदै ग्लोबल छनोटमा पुग्न चाहन्छ । युएईले घरेलु मैदान र वातावरणको अतिरिक्त फाइदा उठाउने सोचमा छ । यता नेपाल भने युएईमाथि सहज जितका साथ ग्लोबल छनोटमा आफ्नो स्थान पक्का गर्न चाहन्छ । नेपाल ४ खेलमा ३ मा जित र १ मा हार सहित ६ अंकका साथ दोस्रो स्थानमा छ । नेपाललाई जित मात्रले भने पुग्दैन । नेटरनरेटमा पनि ध्यान दिनुपर्ने हुन्छ । नेपालको नेटरनरेट २.०८८ र युएईको २.३९८ छ ।

नेपालको ओपनर सीता रानामगर लयमा देखिएकी छिन् । उनलाई अर्कोतर्फबाट साथ दिन आवश्यक देखिन्छ । नेपाल पहिलो खेलमा हङकङसँग ६ विकेटले पराजित भएपछि दबाबमा परेको हो । त्यसपछि नेपालले सानदार जितका साथ अघिल्लो चरणको सम्भावना कायमै राखेको हो । भुटानलाई ८ विकेट, कुवेतलाई ९ विकेट र मलेसियालाई ६ विकेटले पराजित गरेको थियो ।

युएईले मलेसियालाई ३० रन, हङकङलाई ११ रन, भुटानसँग ४७ रन र कुवेतलाई ७ विकेटले हराउँदै अघिल्लो चरण नजिक छ । अन्तिम बल वा सामान्य रन अन्तरको हारको बाबजुद पनि युएई शीर्षस्थानमा रहँदै ग्लोबल छनोटमा पुग्नसक्छ । युएईले प्रस्तुत गरेको लक्ष्यमा सबै विपक्षी टोलीले १ सय माथि रन बनाएका छन् । त्यसैले युएईको बलिङ केहि कमजोर छ । उक्त कमजोरीलाई नेपालले भरपूर्ण फाइदा उठाउन आवश्यक देखिन्छ ।

ओपनर थ्रीथा सतिस राम्रो लयमा छिन् । उनी ४ खेलमा १ सय १८ रन बनाउँदै सर्वाधिक रन बनाउनेमा दोस्रो स्थानमा छिन् । इशा ओझा पनि नेपाललाई घातक बन्न सक्ने ब्याटरमा पर्दछिन् । तीव्र गतिकी बलर खुशी शर्माबाट नेपाली ब्याटर सचेत रहन आवश्यक देखिन्छ । नेपालले आक्रामक ब्याटिङ गर्न आवश्यक देखिन्छ । यस प्रतियोगितामा बाउन्ड्री प्रहार गर्न संघर्ष गर्दै आएको छ ।