काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिज अन्तर्गत ओमानसँग दोस्रो खेलमा उत्कृष्ट सुरुवात गरेको छ ।

अल अमरेत क्रिकेट मैदान मस्कटमा टस हारेर ब्याटिङको निम्तो पाएको घरेलु टोली ओमानले सुरुवाती ९ ओभरमा ३ विकेट गुमाउँदै ३० रन बनाएको छ । मोहम्मद नदीम र जिसन मक्सुद क्रिजमा छन् । नेपाललाई तीनै सफलता तीव्र गतिका बलर करण केसीले दिलाउँदै उत्कृष्ट सुरुवात दिलाएका हुन् ।

करणको तेस्रो ओभरको चौथो बलमा स्कुपसट खेल्नेक्रममा एज लागेर ओपनर जतिन्दर सिंह फस्ट स्लिपमा आसिफ शेखबाट १३ रनमा क्याच आउट हुन पुगेका थिए । पहिलो खेलमा नेपालविरुद्ध शतक प्रहार गरेका जतिन्दरले दोस्रो खेलमा १३ बलमा १ चौका र १ छक्का प्रहार गरे । करणको सातौं ओभरको पाँचौ बलमा टप एज लागेर डेब्यू खेल खेलेका सुफ्यान मोहम्मद चार रनमा सुशान भारीबाट क्याच आउट भए ।

नवौं ओभरको दोस्रो बलमा करणकै बलमा अयान खानको क्याच विकेटकिपर विनोद भण्डारीले समाउन सकेनन् । तर त्यसको दुई बलपछि नै करणले अयानलाई ७ रनमा बोल्ड गरे ।

नेपालले आजको खेलमा दुई परिवर्तन गरेको छ । कुशल मल्ल र गुलशन झाको स्थानम शरद भेषावकर र आरिफ शेखलाई मौका दिएको छ ।

नेपालको प्लेइङ-११ : ज्ञानेन्द्र मल्ल (कप्तान), कुशल भुर्तेल, आसिफ शेख, रोहित कुमार पौडेल, शरद भेषावकर, सोमपाल कामी, आरिफ शेख, करण केसी, विनोद भण्डारी(विकेटकिपर), सन्दीप लामिछाने र सुशान भारी ।