यो खेलका क्रममा तयार पारिएको समाचार थियो । खेलको नतिजा यसप्रकार छ : सन्दीपको ६ विकेटसँगै नेपालको कीर्तिमानी जित

काठमाडौं (हाम्रो खेलकुद) – नेपालले पपुवा न्युगिनीविरुद्ध दोस्रो ओडिआई खेलमा बलिङमा राम्रो सुरुवात गरेको छ । नेपालले प्रस्तुत गरेको २ सय ३४ रनको मध्यम विजयी लक्ष्य पछ्याएको पिएनजीले सुरुवाती ७ ओभरमा २ विकेट गुमाउँदै २७ रन बनाएको छ ।

पिएनजीका ओपनर टोनी उरा १६ रनमा अविजित छन् । चार्ल्स अमिनी ५ रनमा अविजित छन् । ओपनर लेगा सियाकालाई तीव्र गतिका बलर सोमपाल कामीले दोस्रो ओभरको तेस्रो बलमा ४ रनमा बोल्ड आउट गर्दै उत्कृष्ट सुरुवात दिलाएका थिए । अर्का तीव्र गातिका बलर विक्रम सोबले कप्तान असाद भालालाई चौथो ओभरको पाँचौं बलमा विकेटकिपर विनोद भण्डारीबाट एक रनमा क्याच गराउँदै पिएनजीलाई ११-२ को अवस्थामा पुर्याएका थिए ।

त्यसअघि अल अमरेत क्रिकेट मैदान ओमानमा टस जितेर पहिला ब्याटिङ रोजेको नेपालले ४९.३ ओभरमा २ सय ३३ रनमा अल आउट भएको थियो । नेपालका लागि युवा ब्याट्सम्यान रोहित कुमार पौडेलले १ सय २३ बलमा २ चौका र ३ छक्का सहित सर्वाधिक ८६ रनको योगदान दिए । करण केसीले तल्लोक्रममा २६ बलमा २ चौका र ४ छक्का सहित ४२ रनको आक्रामक इनिङ खेल्दै आउट भएका थिए । कप्तान ज्ञानेन्द्र मल्ल ७० बलमा ३ चौका र २ छक्का सहित ४५ रनमा आउट भएका थिए ।

नेपालले पहिलो खेलमा पिएनजीलाई २ विकेटले पराजित गरेको थियो । नेपालले पहिलो पटक डे नाइट ओडिआई खेल खेलिरहेको छ । आइसिसी विश्वकप लिग–२ अन्तर्गत ओमान र अमेरिकासँग त्रिकोणात्मक ओडिआई सिरिजको तयारीको लागि नेपालले पपुवा न्युगिनीसँग दुई खेल खेलेको हो ।