जाकार्ता (एजेन्सी) – इन्डोनेसियामा जारी १८औं एसियाली खेलकुदको १२औं दिन नेपालले प्याराग्लाइडिङबाट  नेपालले कम्तीमा रजत पदक पक्का गरेको छ ।

गुनुङ मास पुनकाकमा बुधबार भएको पुरुष टिम क्रस कन्ट्री इभेन्टमा नेपालका सबै खेलाडीले टास्क पूरा गर्दै रजतपदक पक्का गरेको छ । रजत जिते नेपालले एसियाडमा रजतपदक सङ्ख्या दुई पु¥याउनेछ । यसअघि तेक्वान्दोकी सविताराज भण्डारीले रजतपदक दिलाएकी थिइन् ।

जाकार्तामा रहेका राष्ट्रिय खेलकुद परिषद (राखेप) का प्रेस सल्लाहकार रोहित दाहालले नतिजा आउन कमतीमा पनि आधी घन्टा लाग्ने बताएका छन् ।

क्रस कन्ट्रीमा नेपालका सबै खेलाडीले टास्क पूरा गरेका थिए । शीर्ष स्थान रहेको जापानका दुई खेलाडीले टास्क पुरा गर्न सकेनन् । नेपालले यसअघिका एसियाडमा तेक्वान्दो, बक्सिङ र करातेबाट गरी २३ पदक जित्न सफल भएको थियो ।

पाँचौ राउन्डको खेल सकिदा नेपालले ८ हजार ५ सय ९१ अंक जोडेको छ । पहिलो स्थानमा रहेको जापान भन्दा नेपाल ७ सय ६८ अंकले पछि छ । जापानको कुल ९ हजार ३ सय ५९ अंक छ । तेस्रो स्थानमा रहेको दक्षिण कोरियाको ८ हजार अंक छ ।

प्याराग्लाइडिङको टिम क्रस कन्ट्रीमा पाँच खेलाडी हुनेछन् । उनीहरुलाई २५ किलोमिटरको टाक्स दिइएको हुन्छ । हरेक खेलाडीले १००० पूर्णांकको टाक्समा प्रतिस्पर्धा गर्नेछन् । टिममा बिमल अधिकारी, युकेश गुरुङ, विजय गौतम, सुशील गुरुङ र बिशाल थापा छन् ।