काठमाडौं (हाम्रो खेलकुद) – सहिद स्मारक ए डिभिजन लिग अन्तर्गत साविक विजेता मच्छिन्द्रले फुटबल क्लब खुमलटारविरुद्ध पहिलो हाफमै ३-० को अग्रता लिएको छ ।

च्यासल मैदानमा ओलावाले आफिजले २ तथा विमल घर्ती मगरले १ गोल गरे । खुमलटारको डिफेन्सले कमजोर प्रदर्शन गर्दा मच्छिन्द्रले पहिलो हाफमै पकड जमाएको हो ।

खेलको २४ औं मिनेटमा आफिजले सुरुवाती अग्रता दिलाए । सुरज विकको लामो पासलाई अफिजले शारीरिक शक्तिको उपयोग गर्दै उत्कृष्ट टर्न गरे । भारतीय डिफेन्डर सान्विल कोस्टालाई पेनाल्टी क्षेत्र बाहिर बिट गरेपछि पेनाल्टी क्षेत्रभित्र लगेर उनले फिनिस गरे ।

त्यसको ५ मिनेट नबित्दै आफिजले दोस्रो गोल गरे । चेन्चो ग्याल्सेनको पासमा डिफेन्स लाइन बिट भएपछि गोलरक्षकसँग वन भर्सेस वनमा बल फुस्केपनि पेनाल्टी क्षेत्रभित्र रिबाउन्डमा आफिजले गोल गरे ।

इन्ज्युरी समयको तेस्रो मिनेटमा विमलले तेस्रो गोल गरे । चेन्चोको सुरुवाती प्रहार गोलरक्षक देव लिम्बुले जोगाएपनि फर्केर आएको बललाई विमलले नियन्त्रणमा लिँदै दोस्रो टचमा गोल गरे ।

यस्तै एन्फा कम्प्लेक्समा जारी खेलमा आर्मीले जावलाखेलविरुद्ध १-० को अग्रता लिएको छ । जिलेस्पी जंग कार्कीको गोलमा आर्मी अघि बढेको हो ।