काठमाडौं (हाम्रो खेलकुद) – छैटौं महिला साफ च्याम्पियनसिप २०२२ अन्तर्गत समूह ए को खेलमा भारत र माल्दिभ्स भिड्दैछन् । पहिलो हाफमा भारतले ३-० को अग्रता लिएको छ ।

खेलको छैटौं मिनेटमा नै भारतले अग्रता लिने अवसर पाएको थियो । गोलरक्षक तथा माल्दिभ्सकी कप्तान अमिनाथ लिजाले क्रस छुटाएपछि भारतकी प्रियंका देवी नाओरमको प्रहारलाई शहफा सिउथले गोललाइनबाट क्लियर गरिन् ।

दशौं मिनेटमा दाङमेइ ग्रेसले वन भर्सेस वनमा गरेको प्रहार लिजाले बचाइन् । १३ औं मिनेटमा पेनाल्टी क्षेत्र भित्र डिफेन्डर बिट गरेपछि अन्जुले गरेको अन्तिम प्रहारले पोस्टको दिशा लिन सकेन ।

२४ औं मिनेटमा भारतले अन्जुको गोलमा अग्रता लियो । कप्तान आशालता देवीसँग छोटो कर्नर लिएकी अन्जुले फिर्ता आएको पासमा लामो प्रहार गरेकी थिइन् । उनले बायाँ विंगबाट गरेको प्रहार गोलरक्षकको हातमा लाग्दै गोल भएको हो ।

खेलको ४२ औं मिनेटमा भारतले अग्रता दोब्बर पार्यो । छोटो कर्नरमा कप्तान आशालताले दिएको लामो पास क्लियर हुन नसक्दा प्रियांकाले पेनाल्टी क्षेत्र भित्रबाट गरेको प्रहार गोल भएको थियो ।

पहिलो हाफको इन्ज्युरी समयमा अन्जुले भारतलाई ३-० ले अघि बढाइन् । रतनबाला देवी नोङमाइथेमले पेनाल्टी क्षेत्र बाहिरबाट गरेको प्रहार पोस्टमा लागेर गोलरक्षकलाई लाग्दै झरेपछि खाली पोस्टमा अन्जुले गोल गरेकी थिइन् ।

यस समूहमा बंगलादेश २ खेलमा ६ अंक जोड्दै शीर्षस्थानमा छ । भारतले पहिलो खेलमा पाकिस्तानलाई ३-० ले पराजित गरेको थियो । आजको खेल जितेमा दुवै भारत र बंगलादेश सेमिफाइनलमा प्रवेश गर्नेछन् ।