एजेन्सी – छैटौं साफ महिला च्याम्पियनसिप २०२२ अन्तर्गत समूह ए को दोस्रो खेलमा बंगलादेश र माल्दिभ्स खेल्दैछन् । पहिलो हाफको समाप्तिमा बंगलादेशले ३-० को अग्रता लिएको छ ।

एकपक्षीय खेलमा बंगलादेशकी कप्तान सविना खातुनले दुई गोल गरेकी छिन् । अर्को गोल मसुरा प्रविनको नाममा रहेको छ । बंगलादेशले खेलको सुरुवातदेखि नै माल्दिभ्सको पोस्टमा आक्रमण सुरु गरेको थियो । पटक पटक गोलको अवसर सिर्जना गरेपनि बंगलादेशका फरवार्डले सुरुवाती आधा घण्टामा गोल गर्न सकेनन् ।

कप्तान सविना खातुनले खेलको ३१ औं मिनेटमा सुन्दर गोल गर्दै बंगलादेशलाई अग्रता दिलाइन् । सन्जिदा अख्तरको पास लिएपछि उनले झन्डै ३५ यार्ड टाढाबाट गरेको प्रहार माल्दिभ्सकी कप्तान तथा गोलरक्षक अमिनाथ लिजाले ढिलो ठम्याएपछि गोल भएको थियो ।

बंगलादेशका लागि ३४ औं मिनेटमा मसुरा प्रविनले अग्रता दोब्बर पारिन् । पेनाल्टी क्षेत्रभित्र बल क्लियर नभएको अवस्थामा उनले खुला बललाई पोस्टको दिशा दिएकी थिइन् ।

खेलको ४० औं मिनेटमा कप्तान सविनाले व्यक्तिगत दोस्रो गोल गरिन् । गोलरक्षक अमिनाथले मारिया मान्दाको पहिलो प्रहार बचाएपनि रिबाउन्डमा उनले दोस्रो बारमा सहजै गोल गर्दै ३-० को अग्रता दिलाइन् ।

यसअघि समूहको पहिलो खेलमा भारतले पाकिस्तानलाई ३-० ले हराएको थियो ।