काठमाडौं (हाम्रो खेलकुद) – गोल मेसिन सावित्रा भण्डारी ‘साम्वा’ को गोलमा नेपालले छैटौं महिला साफ च्याम्पियनसिप अन्तर्गत भुटानविरुद्धको खेलको पहिलो हाफमा १-० को अग्रता लिएको छ । खेलको १२औं मिनेटमा सावित्राले गोल गर्दै नेपाललाई अग्रता दिलाएकी हुन् ।

त्रिपुरेश्वरस्थित दशरथ रंगशालामा मंगलबार भएको खेलको तेस्रो मिनेटमा फ्रिकिकमा भुटानी खेलाडीको हेडर पोस्ट नजिकैबाट बाहिरिदा भुटान अग्रता लिनबाट चुकेको थियो । नवौं मिनेटमा सावित्रा भण्डारीको डि बक्स बाहिरको प्रहारले पोस्टको गति लिन सकेन ।

११औं मिनेटमा हिरा कुमारी भुजेलको बक्स बाहिरको सशक्त प्रहार पोलमा लागेर फर्कदा नेपाल अग्रता लिनबाट चुक्यो । १२औं मिनेटमा सावित्राले गोल गर्दै नेपाललाई सुरुवाती अग्रता दिलाइन् । गोलरक्षक सविता मोन्गेर अघि बढ्दै बललाई क्लियर गर्न खोजेको अवस्थामा अमिशासँग जुध्दै आएको बललाई सावित्राले खाली पोस्टमा गोल गर्न सफल भइन् ।

यससँगै सावित्रा भटानविरुद्धको चौथो खेलमा लगातार गोल गर्न सफल भइन् । उनले यसअघि तेस्रो, चौथो र पाँचौ साफमा गोल गर्न सफल भएको थियो । साफमा भुटानविरुद्ध उनको यो नवौं तथा सम्रगमा राष्ट्रिय टोलीबाट ३९औं गोल हो ।

३२औं मिनेटमा गोलरक्षक सविता मोनगेरबाट फुस्किएको बललाई सावित्राले नियन्त्रणमा लिदै गरेको प्रहारलाई डिफेन्डरले क्लियर गरिदिइन् । लगत्तै अनिता बस्नेतको क्रसमा सावित्राको हेडर दोस्रो बार च्याप्दै बाहिरिदा नेपाल अग्रता दोब्बर पार्नबाट चुक्यो । ३५औं मिनेटमा कप्तान पेमा छोदेन छिरिङले पेनाल्टी बक्समा सुवर्ण अवसर पाएपनि प्रहार गर्न ढिला गर्दा भुटान बराबरीबाट चुक्यो ।