ह्युस्टन, अमेरिका (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिजमा घरेलु टोली अमेरिकाविरुद्ध मजबुत ब्याटिङ गरेको छ । ह्युस्टनस्थित मुसा क्रिकेट स्टेडियममा टस जितेर पहिला ब्याटिङ रोजेको नेपालले ३२ ओभरमा २ विकेट गुमाउँदै १ सय ५४ रन बनाएको छ ।

नेपालका देव खनाल ६० बलमा ३ चौकासहित ४२ रनमा अविजित छन् । रोहित पौडेल २७ बलमा २० रनमा क्रिजमा छन् ।विकेटकिपर तथा ओपनर आसिफ शेख ७० बलमा ६ चौकासहित ६१ रनमा आउट भए ।

आसिफले ५८ बलमा ओडिआई करिअरको दोस्रो अर्धशतक प्रहार गरे । गतवर्ष आसिफले ओमानविरुद्ध ९० रनको इनिङ खेल्दै करिअरको उच्च प्रदर्शन गरेका थिए । आसिफको यो १० औं ओडिआई खेल हो ।

आसिफ अमेरिका भ्रमणमा अभ्यास खेलमा नेपाली अल स्टाार्सविरुद्धको खेलमा चोटका कारण एक हप्ता मैदान बाहिर रहेका थिए । खुट्टाको चोटका कारण आसिफले ओमानविरुद्ध खेल गुमाउनु परेको थियो । आसिफ पूर्ण फिट नभएपनि महत्वपूर्ण अर्धशतक प्रहार गरेर आउट भए ।

पहिलो विकेटका लागि चोटबाट फर्किएका दुबै ओपनर आसिफ शेख र कुशल भुर्तेलले ११.५ ओभरमा ५६ रनको अर्धशतकीय साझेदारी गर्दै नेपाललाई राम्रो सुरुवात दिलाएका थिए ।

ग्रोइन चोटबाट फर्किएका ओपनर कुशल भुर्तेल ३६ बल खेल्दै १९ रनमा बोल्ड भए । निसर्ग पटेलको बलमा कुशल स्वीप सट खेल्ने धुनमा मिस हुँदा बोल्ड हुन पुगेका थिए । दोस्रो विकेटका लागि देव खनाल र आसिफले ६२ रनको साझेदारी गरेका थिए ।