काठमाडौं (हाम्रो खेलकुद) – नेपाली क्रिकेट टोलीका मध्यक्रमका ब्याटर दीपेन्द्रसिंह ऐरी पपुवा न्युगिनीसँगको पहिलो ओडिआई खेलमा पनि सस्तैमा आउट भएका छन् ।

२ सय ९३ रनको विशाल विजयी लक्ष्य पछ्याएको नेपालले १४ ओभरमा ४ विकेट गुमाउँदै ७८ रन बनाएको छ । आरिफ शेख २ र रोहित कुमार पौडेल १३ रनमा अविजित छन् ।

दीपेन्द्र स्पिनर चाल्र्स अमिनीको स्वलो बलमा कभरमा जेसन किलाबाट १५ रनमा क्याच आउट भए । दीपेन्द्र पछिल्ला खेलमा खराब लयमा छन् । युएई भ्रणमा दीपेन्द्र पपुवा न्युगिनीसँग पहिलो खेलमा ८ र युएईसँग ४ रनमा आउट भएका थिए । बाँकी दुई खेलमा भने खाता खोल्न सकेका थिएनन् ।

ओपनर अनिल शाह र कुशल भुर्तेलले पहिलो विकेटका लागि ७.३ ओभरमा ३६ रनको साझेदारी गरेका थिए । तीव्र गतिका बलर नर्मन भानुआले अनिललाई सेसे बाउटबाट ६ रनमा क्याच आउट गराए । २०१८ पछि नेपाली टोलीमा फर्किएका अनिलले २१ बलमा १ चौका प्रहार गरे ।

लगत्तै नवौं ओभरको अन्तिम बलमा डेब्यू खेल खेलेका देव खनाल शून्यमा क्याच आउट भए । नोसिना पोकनाको बलमा ठूलो सट खेल्ने धुनमा मिडअनमा देव हिरि हिरीबाट क्याच आउट भए । १० औं ओभरको पहिलो बलमा भानुआले भुर्तेललाई ३२ रनमा बोल्ड आउट गरेपछि नेपालले खराब सुरुवात गरेको छ । भुर्तेल २८ बलमा ६ चौका प्रहार गरे ।

त्यसअघि टियु क्रिकेट मैदानमा टस हारेर पहिला ब्याटिङ थालेको पपुवा न्युगिनीले निर्धारित ५० ओभरमा ८ विकेट गुमाउँदै २ सय ९२ रन बनाएको थियो ।

पपुवा न्युगिनीलाई कीर्तिमानी लक्ष्यमा पुर्याउन मध्यक्रमका ब्याटर चाल्र्स अमिनीले १ सय ३ बलमा ६ चौका र १ छक्कासहित सर्वाधिक ७७ रनको इनिङ खेले । तल्लोक्रममा नर्मनले २८ बलमा ४ चौका र ३ छक्का सहित ४७ र कप्तान असाद भाला ५५ बलमा ११ चौकासहित ६० रन बनाए ।