काठमाडौं (हाम्रो खेलकुद)– नेपाल बास्केटबल संघका उपाध्यक्ष भीम सिंह गुरुङ संघको कार्यवाहक अध्यक्ष चयन भएका छन् । लामो समयदेखि संघका अध्यक्ष लामा टेण्डी शेर्पा अस्वस्थ रहेपछि उनकै प्रस्तावमा गुरुङ मंगलबार कार्यवाहक चुनिएका हुन् । पछिल्लो निर्वाचनमा उनी उपाध्यक्षमा निर्वाचित भएका थिए ।

उपचारका क्रममा रहेका शेर्पा भर्चुअल र अन्य पदाधिकारीसहित ९ जनाको भौतिक उपस्थितिमा गुरुङलाई कार्यवाहक अध्यक्ष चयन गरिएको संघका महासचिव नरेन्द्र थापाले जानकारी दिए । ‘हाम्रो अध्यक्षले फिब र फिब एसियामा पत्राचार गराएर जानकारी दिनुभएको थियो,’ उनले भने, ‘त्यसपछि हामीले हिजो बैठक बसेर त्यसलाई औपचारिक रुपमै अनुमोदन गरेका छौं ।’ शेर्पा पछिल्लो तीन वर्षदेखि नशा सम्बन्धी रोगका कारण थला परेका छन् ।

चार वर्षे कार्यकाल गत कात्तिकमा नै पूरा भएपनि राष्ट्रिय खेलकुद विकास ऐन २०७७ लागू भएयता कुनै पनि संघको निर्वाचन हुन सकेको छैन । नियमावली तयार भएपछि संघ निर्वाचनमा जाने राष्ट्रिय खेलकुद परिषद् (राखेप) ले जनाएपनि अहिले सम्म कुनै प्रक्रिया अघि बढेको छैन । महासचिव थापाले कार्यवाहक अध्यक्ष चयन गरेको विषयमा राखेप र नेपाल ओलम्पिक कमिटीलाई जानकारी गराइने बताए ।

संघको हिजोको बैठकले कोभिड १९ संक्रमणको अवस्था सहज भएपछि बास्केटबल गतिवधिलाई अघि बढाउने विषयमा पनि छलफल गरेको थापाले जानकारी दिए । बास्केटबलले झन्डै दुई वर्षअघि स्वदेशमा भएको १३ औं दक्षिण एसियाली खेलकुद (साग) मा ४ वटा पदक जितेको थियो ।

कार्यवहाक अध्यक्ष गुरुङले अध्यक्ष शेर्पाले नै आफूलाई अघि बढाएकोले भविष्यमा उहाँले गरेको कामलाई निरन्तरता दिदै बास्केटबललाई पूरानै अवस्थामा पुर्याउन कोशिस गर्ने बताए । ‘टेण्डी दाई अस्वस्थ हुँदा बास्केटबल विकासमा त्यसले ठूलो असर गरेको थियो ,’ उनले भने, ‘अब दाईको चाहना अनुसार हामीले जिम्मेवार पाएका छौं र आउने दिनमा आक्रामक रुपमा सबैको सहयोगमा बास्केटबल विकासमा जुट्नेछौं । बास्केटबल परिवार सबैलाई साथमा लिएर अघि बढ्नेछौं ।’